धावी पास करपी कातकरी समाजातलो गणेश थारलो पयलो विद्यार्थी

भांगरभूंय | प्रतिनिधी

कोरगांव, मकबूल माळगिमनीः ना धड वळख, ना अधिकृत नागरिकत्वाचे पुरावे. शिक्षणा कडेन संबंद ना. रावपाक ना धड घर, जिणेच्यो मुळाव्यो गरजो भागोवंक फावो तें उत्पन्न ना. थळाव्या, देशी भासांचें गिन्यान ना. अशे परिस्थितींत ‘अशिक्षीत’ मानपी समाजाची अस्मिताय बदलपाचें ध्येय दवरून गणेश पवार धावेची परिक्षा पास जालो.
पेडणें तालुक्यांतल्या विर्नोडा वाठारांत वानरमारे वा कातकरी समाजाचे लोक रावतात तांतूतलो हो एक गणेश पवार. वळपे-विर्नोडाच्या विकास हायस्कुलांतल्यान माध्यमीक शाळा प्रमाणपत्र (एसएससी) परिक्षेंत 44 टक्के गूण मेळोवन धावी पास जावपी तो कातकारी समाजांतलो पयलो विद्यार्थी थारलो. वानरमारे (कातकारी) समाजांतले 12 ते 13 कुटुंबांतले 25 ते 30 लोक विर्नोड्यांत जायतीं वर्सां सावन रावतात. ना धड घर, ना हेर सुविधा. उदरनिर्वाहाक वेवसाय म्हणून मजूरी करप, हंगामी रानटी भाजयो विकप हें तांचें काम. ह्या जाग्यार रावपा खातीर देशप्रभू कुटूंब आनी हेर भाटकार लोकांचो आदार मेळ्ळो. शिक्षणाच्या मळार तांचो व्हडलोसो संबंद ना. रेशन कार्ड ना, आधार कार्ड ना, भुरगीं जल्माक आयलीं पूण तांची जल्मपत्रिका ना.
अशें परिस्थितींत पेडणें तालुक्यांत तशेंच गोंयांतल्या जायत्या संघटनांनी मजत केली, पेडणें आनी मांद्रेच्या आमदारांनी सहकार दिलो. आतां रेशन कार्ड, आधार कार्ड, भुरग्यांचे जल्म प्रमाणपत्र आयले. पूण वेगवेगळ्या कारणांक लागून एकाय भुरग्याक पुराय शिक्षण मेळ्ळें ना. आमकां शिक्षण मेळ्ळें ना, पूण भुरग्यांक तें मेळचें अशें पालकांक दिसता. पूण भाशेचें गिन्यान नाशिल्ल्यान कांय भुरगीं शिक्षण अर्दवट सोडटालीं. तातूंत गणेश पवार हाका बरें मार्गदर्शन मेळ्ळें आनी ताणें वळपे- विर्नोडाच्या शाळेंतल्यान धावेची परिक्षा दिली. सगळ्या आव्हानांक येसस्वीपणान तोंड दिवन संकश्टां पयस करून धावेची परिक्षा तांणी पास केली.
शिक्षणान म्हज्या खातीर उपलब्ध करुन दिल्ल्या संदीचे हांव उपकारी आसा. शाळेंतल्यान म्हजो प्रवास आव्हानात्मक आशिल्लो, पूण त्या आव्हानांनी म्हाका शिकयलें की जिद्द आनी आदार तुमचें नशीब बदलूंक शकता. हें येस फकत म्हजें न्हय, तें म्हज्या पुराय समाजाचें. म्हजी ही काणी म्हज्या समाजांतल्या हेर भुरग्यांक तांचीं सपनां साध्य करपाक प्रेरणा दितली अशी आस्त बाळगता, अशें गणेश पवारान सांगलें.