भांगरभूंय | प्रतिनिधी
पणजी: गोंय विद्यापिठान विद्यापीठ अनुदान आयोगा कडल्यान (युजीसी) मंजूर जाल्ले 77.34 लाख रुपयांचें अनुदान वेळेंत वापरूंक नाशिल्ले खातीर महालेखापालान (कॅग) विद्यापिठाचेर ताशेरे ओडले. विद्यापिठान हालींच 2021-22 ह्या अर्थीक वर्सा खातीर केल्लें ऑडीट उजवाडायलां. हातूंत ही म्हायती मेळ्ळी. हाका विद्यापिठान फुडल्या ऑडिटांत ह्या निधीचो वापर दाखयतले अशी म्हायती कॅगाक दिली.
विद्यापिठाच्या ऑडिटाचेर कॅगान म्हणलां की, गोंय विद्यापिठान ऑडिटांत युजीसी कडल्यान 77.43 लाख रुपया मेळिल्ल्याचो उल्लेख केला. 2020-21 ह्या अर्थीक वर्सांत ही रक्कम आरबीआय खात्यांत जमा लेगीत जाल्ली. पूण विद्यापिठान 31 मार्च 2021 मेरेन ही रक्कम खात्यांतल्यान काडली ना. ताका लागून आरबीआयच्या नेमा प्रमाण ती स्थगीत जाली. 31 मार्च 2022 मेरेन ही रक्कम मेळूंक नाशिल्ल्यान विद्यापिठान तांच्या अकावंट एन्ट्रींत तसो उल्लेख करप गरजेचें आसा.
पूण अशें जावंक नाशिल्ल्यान ऑडिटांत उल्लेख केल्ल्या विद्यापिठाची सद्याची मालमत्ता, रीण तशेंच अतिरिक्त ह्या दोनूय विभागांत 77.43 लाख रुपया अदीक जाल्यात. तशेंच अकावंटींगच्या प्रमाणान मालमत्तेच्या र्हासाचे मुल्य आनी पद्दत बदल्ली आसल्यार ऑडिटांत तशी नोंद आसप गरजेचें आसता. विद्यापिठाच्या वित्तीय समितीन 24 फेब्रुवारी 2024 दिसा ही पद्दत बदलिल्ली. पूण हे विशीं ऑडिटांत योग्य पद्दतीन म्हायती दिली ना.
तशेंच विद्यापिठान ऑडिटांत इमारतीचो ऱ्हास दर 1.67 टक्के दाखयला. इमारतीचे मालमत्तेंत कांय इमारती ह्या इलेक्ट्रीकल इन्स्टॉलेशन आनी उपकरणां ह्या विभागांत येतात. तांचे र्हास दर 10 टक्के आसता. तशेंच विद्यापिठान 1 लाख 63 हजार 21 चौमि सुवात आपल्या ताब्यांत आशिल्ल्याचें म्हणलां. पूण हातूंतली 6 हजार चौमि सुवात 99 वर्सांच्या लिजार दिल्या. ह्या गजालीचो अकावंट स्टेटमेंटांत उल्लेख करप गरजेचें आशिल्ल्याचें कॅगान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
