भांगरभूंय | प्रतिनिधी
भारताच्या फुटबॉल पंगडाचो मुखेली सुनील छेत्रीन आंतरराष्ट्रीय फुटबॉल मळा वयल्यान निवृत्त जावपाची घोशणा केली. सोशल मिडियाचेर व्हिडियो शॅर करून ताणें निवृत्ती विशीं म्हायती दिली.
छेत्री आपली निमाणी आंतरराष्ट्रीय मॅच 6 जूनाक कुवेता आड खेळटलो. सुनील छेत्री हो भारतीय फुटबॉल मळा वयलो म्हत्वाचो भाग आशिल्लो. 39 वर्सां पिरायेच्या छेत्रीन भारता वतीन खेळटना साबार विक्रम आपल्या नांवार केल्यात. देशा वतीन 150 मॅची खेळटना 94 गोल केल्यात. तो सध्या आंतरराष्ट्रीय मळार सगल्यांत चड गोल करपाचे वळेरेंत चवथे सुवातेर आसा.
आपली पयली मॅच अजून उगडासांत आसा, आपली पयली मॅच, आपलो पयलो गोल, हो आपल्या प्रवासांतलो सगल्यांत उगडासांत उरपा सारको खीण आसा. देशा वतीन आपूण इतक्यो मॅची खेळपाक शकतलो अशें केन्नाच दिसूंक नाशिल्लें अशें ताणें म्हणलें.
छेत्रीन 12 जून 2005त आंतरराष्ट्रीय फुटबॉलांत पदार्पण केल्लें. तेच मॅचींत ताणें आपलो पयलो आंतरराष्ट्रीय गोल केल्लो.
खेल रत्न, पद्मश्री आनी अर्जुन पुरस्कार
– छेत्रीक 2021त खेल रत्न पुरस्कार फावो जाल्लो. ते पयलीं 2019त पद्मश्री आनी 2011त अर्जुन पुरस्कार फावो जाल्लो. हाचे खेरीत स खेपे एआयएफएफ प्लेयर ऑफ दी इयर पुरस्कार जिखला.
-छेत्रीन भारता वतीन 2005त वरिश्ठ पंगडांत सुवात मेळयिल्ली. बायच्युंग भुतिया उपरांत ताणेंच भारताचें फुडारपण केलें. ताणें 150 मॅचींनी 94 गोल केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
