भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज येजमान मुंबय इंडियन्स आनी लखनौ सुपर जायण्ट्स ह्या पंगडां मदीं हांगाच्या वानखेडे स्टेडीयमाचेर जातली.
मुंबय इंडियन्साचें प्ले ऑफांतलें आव्हान पयलींच सोंपला, जर लखनौ सुपर जायण्ट्स आपले निमाणे मॅचींत व्हडा फरकान जैत जोडपाक येसस्वी थारता तर घडये तो निमाण्या चारांनी सुवात मेळुये. व्हडा फरकान जैत जोडलें तरीय प्ले ऑफांत पावपाची ताची शक्यताय खूब उणी आसा.
सेगीत तीन हारींक लागून लखनौन गुणूय व्हगडायले आनी रन रेट लेगीत इबाडली. कोलकाता नायट रायडर्सा कडल्यान 98 धांवड्यांनी हारल्या उपरांत ताका सनरायझर्स हैदराबादा आड 10 विकेटींनी आनी दिल्ली कॅपिटल्सा आड 19 धांवड्यांनी हार घेवची पडली. सातवे सुवातेर आशिल्ल्या लखनौची रन रेट -0.787 आसा जाल्यार सवे सुवातेर आशिल्ल्या रॉयल चॅलेंजर्स बंगळुरूची रन रेट 0.387 आसा.
पांच खेपे वस्तादपण जोडपी मुंबय इंडियन्स अंदूंच्या प्ले ऑफांतल्यान भायर पडपी पयलो पंगड थारिल्लो. हार्दीक पांड्याच्या फुडारपणाखाला खेळपी मुंबय इंडियन्सान सामकी निर्शेणी हाडपी प्रदर्शन केल्लें. 13 मॅचींनी फकत चार मॅचींनी जैत जोडलां. आयची मॅच जिखली जाल्यार ताचे 10 गूण जातले आनी निमाणे सुवातेर उरपा पसून वाटावतलो.
हार्दीक पांड्याक मुखेलपद दिल्ल्यान मुंबय इंडियन्साचे चाहते सामकें बेजार जाल्ले.
बॅट्समनांनी सामकें निर्शेणी हाडपी प्रदर्शन केल्लें. बॉलिंगेंत फकत फास्ट बॉलर जसप्रीत बुमरान सदचे भशेन उत्कृश्ट प्रदर्शन केलें. पूण, ताका हेर बॉलरां कडल्यान म्हणपा सारको तेंको मेळूंक ना.
आयचे मॅचींत संवसारीक टी-20 सर्ती खातीर राष्ट्रीय पंगडांत आशिल्ल्या रोहीत शर्मा, हार्दीक पांड्या आनी सुर्यकुमार यादव हांचेर सगल्यांची नदर आसतली. रोहीत फाटल्या स डावांनी अपेशी थारला. ताचो सर्वोच्च स्कोर 19 आसा. पांड्याक अश्टतासांचें प्रदर्शन करपाक जमूंक ना. सुर्यकुमार यादवान तीन अर्द शेंकडे आनी एका शेंकड्या नेटार आत्मविस्वास मेळयला.
लखनौचो मुखेली लोकेश राहुलान तीन अर्द शेंकड्यां सयत 136.36चे स्ट्रायक रेटीन 465 धांवड्यो केल्यात. ताची स्ट्रायक रेट चर्चेचो विशय थारिल्लो. निकोलस पुरन बरें प्रदर्शन केलां. पूण, सांघीक रितीन प्रदर्शन करपाक पंगडाक अपेस आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
