भांगरभूंय | प्रतिनिधी
गोंयचो रणजी खेळगडो मोहीत रेडकाराची हाय पर्फोमन्स इमर्जींग 23 वर्सां पिराये सकयल्या सिनीयर क्रिकेट शिबिरा खातीर राष्ट्रीय क्रिकेट अकादमींत निवड जाली.
तामिळनाडूच्या कोईंबतूर शारांत प्रगत प्रशिक्षण शिबीर 10 ते 29 जून ह्या कालावधीत जातलें. भारतीय क्रिकेट नियामक मंडळाचे सिनीयर निवड समितीन गोंय क्रिकेट संघटणेच्या मोहीत रेडकाराची हाय पर्फोमन्स शिबिरा खातीर निवड केली.
फाटल्या हंगामांत अश्टातासांचें प्रदर्शन करपी मोहीत रेडकाराची 23 वर्सां पिराये सकयल्या आशियायी करंड वन डे क्रिकेट सर्तींत खेळपी भारताच्या अ पंगडांत राखीव खेळगडो म्हणून निवड केल्ली.
23 वर्सां पिरायेच्या मोहीत रेडकारान 2022-23 क्रिकेट हंगामांत रणजी पदार्पण केल्लें आनी आपल्या अश्टतासांच्या प्रदर्शनान सगल्यांक प्रभावीत केल्ले.
रणजी पदार्पणांत राजस्थाना आड खेळटना डावांत 5 विकेटी घेवपी मोहीतान त्या हंगामांत 19 विकेटी आनी 241 धांवड्यो केल्ल्यो.
इमर्जींग कॅम्पांत निवड जाल्ले खातीर मोहीत रेडकाराक गोंय क्रिकेट संघटणेचे अध्यक्ष विपूल फडके, मानद सचीव रोहन गांवस देसाय, भांडारी दया पागी तशेंच जोड सचीव रुपेश नायक हांणी परबीं भेटयली.
मेळिल्ले संदीचो फायदो करून घेत भारतीय क्रिकेट पंगडांत सुवात मेळोवपाची मोख नदरे मुखार दवरची अशें गोंय क्रिकेट संघटणेचे मानद सचीव रोहन गांवस देसाय हांणी म्हणलें.
भारतीय क्रिकेट नियामक मंडळाचे सिनीयर निवड समितीन गोंयच्या क्रिकेटराक सहकार्या केल्ले खातीर ताचें तशेंच बीसीसीआयचें सचीव जय शाह हांचें उपकार रोहन गांवस देसाय हांणी मानलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
