भांगरभूंय | प्रतिनिधी
पणजी : हालीं आडवेळ्या पावसाक लागून लोकांक बरेच त्रास सोंसचे पडटात. गडगड आनी जोगलां सयत हो पावस झडटा. असो पावस झडटना मिरामार, पणजे केरळच्या एका पर्यटकाक जोगलाचो झटको लागून मरण आयलें. त्या तरणाट्याचें नांव अखिल विजयन (३५) अशें आशिल्लें. तो आपल्या कुटुंबा आनी इश्टां सयत दर्यादेगेर आयिल्लो.
मंगळारा रातच्या सुमार ८:३० वरां मजगतीं जोगलां आनी गडगड मारीत झडिल्ल्या पावसान भिजून आपले गाडये कडेन वतना अखिलाचेर हें जोगूल कोसळ्ळें. हातूंत ताची घरकान्न आनी एक व्यक्ती जखमीं जाल्ल्याचें कळ्ळां.
पावस झडपाक लागिल्ल्यान विजयन आनी ताचे वांगडा आशिल्ले ७- ८ जाण गाडये वटेन वचूंक लागले. वतना विजयन अचकीत जमनीर कोसळ्ळो. ताका सांबाळपा खातीर फुडें सरिल्ल्यांक विजयन हालचाल करिना ते पळोवन तांणी ताका १०८ ऑम्बुलन्सींतल्या गोमॅकोंत व्हेलो. थंय दोतोरांनी ताका मरण आयिल्ल्याचें सांगलें. जोगलाचो करंट ताच्या आंगांतल्यान जमनींत गेल्ल्यान ताका मरण आयलें अशी म्हायती पुलिसांनी दिली.
मजगतीं, मेळिल्ले म्हायती प्रमाण, एक पंगड गाडयेचे दिकेन वतालो. ह्या वेळार जोगलाचो एक करंट त्या वाठारांत देंवलो. ताचो प्रभाव रोखडोच विजयन, ताची घरकान्न आनी इश्टाचेरूय जालो. हातूंत विजयन हाका झटको बसून जाग्यारूच मरण आयलें. विजयन हांची घरकान्न आनी इश्ट शुद्देर आयलीं मात विजयन थंय पडून उरलो.
पुलिसांनी कुड पोस्टमार्टमाक धाडून नेटान आयिल्लो जोगलाचो करंट विजयनाच्या मरणाक कारण थारलो अशें सांगलें. उपरांत ताची कूड तांच्या कुटुंबाचे सुवादीन केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
