भांगरभूंय | प्रतिनिधी
मडगांव, प्रतिनिधी: सध्या चोरांचें लक्ष कुंकळ्ळें वाठारांतल्या घरांचेर आसा. माजिलवाडो देवसा हांगच्या सुषमा उदय मांद्रेकार हाच्या घरांत १४ मेक चोरी जाली. चोरांनी रातच्या सुमार १ ते ३.३० वरां मजगतीं मांद्रेंकार हांच्या घराच्या मुखेल दाराचें कुलूप तोडून घरांत प्रवेश केलो. घरांतले आलमारींतल्यान चोरांनी भांगराचो हार, मुदयो, कानांतलीं रिंगां आनी भांगराची सरपळी असो सुमार १ लाख ३० हजारांचो माल चोरी केलो. तशेंच ३५ हजार रुपयांय चोरून व्हेले. मांद्रेकर कुटुंबीयांनी हे विशीं कुंकळ्ळें पुलिसांक म्हायती दिले उपरांत फॉरेन्सीक तज्ञांनी हाताचे ठशे आनी हेर पुरावे एकठांय केले. हे विशीं कुंकळ्ळें पुलिसांनी अनवळखी चोरां आड गुन्यांव नोंद केला.
कुंकळ्ळें पुलीस स्टेशन वाठारांतली हालीं जाल्ली ही तिसरी घडणूक
कुंकळ्ळें वाठारांत म्हयनोभराच्या काळांतली घर फोडपाची ही तिसरी घडणूक जावन आसा. १४ एप्रिलाक रातचें पाट्टें बाळ्ळी हांगच्या लॉनिटा सिल्वा हांच्या घरांत चोरी जाली. अनवळखी चोरांनी घराचे नळे काडून, घरांत भितर सरून, घराची आलमार उक्ती करून सुमार ४.३२ लाखांचो माल चोरी केलो. हे घडणुकेच्या चार दिसां उपरांतूच १८ एप्रिलाक रातचें केगदीकट्टो कुंकळ्ळेंच्या भाड्यान रावपी ओपेंद्र पावल हांच्या घराचें दार फोडून रोख आनी भांगराच्या वस्ती वांगडा साडेआठ लाखांचो माल चोरयेक गेलो.
१४ मेच्या प्रकरणांत श्वान पंगड आनी फॉरेन्सीक पंगडा वरवीं पळोवणी केल्या. हे विशीं कुंकळ्ळें पुलीस निरीक्षक डायगो ग्रासियस हांच्या मार्गदर्शना खाला तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
