भांगरभूंय | प्रतिनिधी
सावयवेरें: कलाकार सदांच कितेंय तरी नवें करपा खातीर धडपडत आसता. आपले कलेंत वेगळेपण हाडून आत्मीक समाधान मेळचें हे खातीर यत्न करीत आसता. सावयवेऱ्यां निशान मंगलदास पालकार ह्या 22 वर्सा पिरायेच्या तरणाट्यान धाग्या पसून लयराई देवीची प्रतिकृती साकारली. ‘द ग्लो ऑफ आई लयराई’ अशें ताणें आपल्या नव्या पोट्रेटाक नांव दिलां.
निशान हो आल्तीन्या वेल्या गोवा कॉलेज ऑफ आर्ट हांगा फायन आर्टसाचें शिक्षण घेता. एक बरो कलाकार म्हूण ताची साववेरें गांवांत वळख आसा. ताणें गावांतल्या कांय तरणाट्यांच्या आदारान सेगीत 15 वरां कश्ट घेवन अयोध्येंतल्या श्रीराममुर्ती प्रतिश्ठापण सुवाळ्या निमतान श्रीअनंत देवळांत भव्य अशी रांगोळी काडिल्ली.
श्रीलईरायी देवीच्या जत्रोत्सवाच्या सात दीस पयली पयलेच फावटी ताणे धाग्या पसून (थ्रेड आर्ट) पोट्रेट करपाचें काम हातांत घेतिल्लें. काळ्या धाग्या पसून सुंदर तशेंच आसा तश्शी लयराईची प्रतिकृती साकारल्या. ही कलाकृती तयार करपा खातीर ताका सात दीस लागले. कुटुंबांतल्या व्यक्तींचें ताका सहकार्य मेळ्ळें अशें ताणें सांगलें.
‘थ्रेड आर्ट’ संबंदी म्हायती दितना ताणें म्हणलें, थ्रेड आर्ट म्हणल्यार धाग्या पसून तयार जाता ती कलाकृती. सगल्यांत पयलीं प्लायवुडाचेर खिळे मारचे पडटात. प्लायवुडाचेर खिळ्यांच्या आदारान मार्कींग करतात. जो आकार काडपाचो आसा ते प्रमाण खिळ्यांचें मार्कींग करप गरजेचें आसता. मागीर धागो सरळ रेशेंत गुठलावचो पडटा. सेगीत आनी योग्य रितीन गुठलावन जाय तशी आकृती वा प्रतिमा तयार करूं येता.
थ्रेड आर्ट ही एक आव्हानात्मक कला आसून हे खातीर एकाग्रताय आनी संयम सामको म्हत्वाचो आसता. लयराई देवीची प्रतिमा साकारतना प्लायवुडाचेर ताणें वट्ट 264 खिळे वर्तुळाकार मारून काळ्या धाग्याचो वापर केलाे. ह्या धाग्याच्यो आडव्यो, उब्यो, तिरप्यो अश्यो सुमार 4 हजार ओळी आंखून पयलेच फावटी लयराई देवीची प्रतिकृती साकारिल्ल्याचें ह्या कलाकारान सांगलें. ताची ही कलाकृती तोखेवपा सारकी आसा आनी तांच्या ह्या कठीण आनी सुंदर कलाकृतीची तोखणाय जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
