भांगरभूंय | प्रतिनिधी
नागरीक सेवा केंद्रांतलो सर्वर बंद; लोकांक मारच्यो पडटात फावटी
भांगरभूंय । प्रतिनिधी
म्हापशें: म्हापशेंच्या कदंब बसस्टॅण्डा वयल्या नागरीक सेवा केंद्रांतलो सर्वर फाटल्या पंदरा दिसांच्यान बंद पडला. हाचो परिणाम म्हणल्यार एक चवदाचो उतारो हे सारके सामकें गरजेचे दस्तावेज मेळनात. हाका लागून ह्या केंद्रांत फावटी मारच्यो पडटात. लोकांक हाचो सुमारा भायर मानसीक त्रास सोंसचो पडटा.
मेळिल्ले म्हायती प्रमाण, सेल डीड वा जमीन विक्री कडेन संबंदीत सरकारी कामकाजा निमतान एक चवदाचो उतारो म्हत्वाचें कागदपत्र आसता. पूण सेटलमेंट आनी जमीन अभिलेख संचालनालयाची ही उपलब्ध केल्ली हो उतारो मेळोवपाची सायट फाटल्या 15 दिसां सावन बंद आसा. हाका लागून लोकांची खूब गैरसोय जाता. लोकांक परतून परतून ह्या नागरीक सेवा केंद्रांत फावटी मारच्यो पडटात.
म्हापशें कदंब बसस्टॅण्डा वयल्या सरकाराच्या म्हायती आनी तंत्रज्ञान खात्या वतीन गोवा इलेक्ट्रॉनिक्स लिमिटेड (जीईएल) हे कंपनी वतीन नागरीक सेवा केंद्राची स्थापना केल्या. सरकारान सगळीं गरजेचीं कागदपत्रां ऑनलायन पद्दतीन थंय उपलब्ध केल्यांत. ताका लागून थंय लोकांची खूब गर्दी आसता. दिसाक उण्यांत उणे 50 परस अदीक लोक एक तवदाचो उतारो मेळोवचे खातीर भेट दितात. पूण सायट चलनाशिल्ल्यान लोकांची गैरसोय जाता. सध्या उबाळ खूब वाडला. ह्या उबाळ्यांत लोकांक परतून परतून फावटी मारच्यो पडटात.
मजगतीं, ह्या सेवा केंद्रांत राबितो प्रमाणपत्र, विचलन प्रमाणपत्र, उत्पन्न प्रमाणपत्र, अधिवास प्रमाणपत्र, जात प्रमाणपत्र, मॅट्रीझ प्रमाणपत्र, हे सारकीं प्रमाणपत्रां मेळटांत. एक चवदाचो उताराचो सर्वर सोडून हेर सगळीं प्रमाणपत्रां मेळपाच्यो सायटी चालू आसात.
समस्येचेर उपाय काडचोः विकास नायक
सरकार मेक इन इंडिया आनी ऑनलायनीचेर लक्ष केंद्रीत करता. अशें आसलें तरीय अश्या साद्या साद्या गजालीं खातीर लोकांचे हाल जातात, हें दुर्दैव. फाटल्या तीन दिसां सावन आपूण ह्या केंद्रांत फावटीं मारता. पूण, सायट बंद आशिल्ल्यान आपल्याक एक चवदाचो उतारो मेळपाक शकना. सरकारान हाची दखल घेवन सर्वसामान्यांक सतावपी समस्या सोडोवची, अशी मागणी विकास नायक हांणी केल्या.
गोंयभरांत हीच स्थिती
नागरीक सेवा केंद्रांतल्या कर्मचाऱ्यां कडल्यान मेळिल्ले म्हायती प्रमाण, फाटल्या 15 दिसांच्यान एक चवदाच्या उताऱ्याची सायट बंद आसा. गोंयभरात ही स्थिती आसा. आमी संबंदितांक कल्पना दिवन फाटपुरवण करतात. तंत्रीक अडचणींक लागून ही सायट बंद चलना. अदीं मदीं सर्वराक कनेक्टिव्हिटी मेळटा, पूण तरी लेगीत चड वेळ सायट चलना. जेन्ना सायट मेळटा, तेन्ना आमी कागदपत्रां काडून दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
