भांगरभूंय | प्रतिनिधी
मडगांव, प्रतिनिधी : आंबेमोळ फातर्पा रावपी कायतान अंतोन फर्नांडीस (४४) हाका व्हाळांत न्हांवपा खातीर गेल्ले कडेन उदकांत बुडून मरण आयलें. ही घडणूक पाट्टेबाळ्ळी वाठारांत घडली. कायतान आपल्या सोयर्यां सयत न्हांवपा खातीर गेल्ले कडेन ही घडणूक घडली.
कायतान हो आंबेमळ फातर्पा हांगा रावपी तो पाट्टे बाळ्ळी आपल्या सोयर्यांगेर गेल्लो. मंगळारा दनपरां कायतान आनी ताचे वांगडा पांच जाण न्हांवपा खातीर व्हाळांत देंवले. तेन्ना कायतान उदकांत बुडपाक लागलो. ताचे वांगडा आशिल्ल्यांनी बोवाळ केलो आनी ताका उदका भायर काडपाक मजत मागली. मात कायतान उदका भायर येवंक ना. सोद घेतल्या उपरांत सुमार पावणे वरांन तो दिसलो. ऍम्बुलन्स आपोवन ताका रोखडोच बाळ्ळी मुळाव्या भलायकी केंद्रांत व्हेलो. थंय ताका मरण आयिल्ल्याचें सांगलें.
पोस्टमार्टमा उपरांत ताची कूड दक्षीण गोंय जिल्हो हॉस्पिटलाच्या मोर्गांत दवरली. हे विशीं कुंकळ्ळी पुलिसांनी हे असैमीक मरण म्हणून नोंद केलां. पुलीस निरीक्षक डायगो ग्रॅसिअस हांच्या मार्गदर्शना खाला पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
