आडवेळ्या पावसाचें प्रमाण फोंड्यां चड

भांगरभूंय | प्रतिनिधी

आडवेळो पावस आसलो तरी तापमान चडेच

पणजी, प्रतिनिधीः राज्यांत आडवेळो पावस पडटा आसलो तरी तापमान चडेंच आसा. पावसाक लागून वातावरणांत काय प्रमाणात थंडसाण तयार जाता. दुसरे दिसा परतून उकाडो जावपाक लागता. बुधवारा पणजेचें चडांत चड तापमान 35.8 अंश जाल्यार मुरगांवचे चडांत चड तापमान 35.6 अंश आशिल्ले. शुक्रारा मेरेन गडगड्या सयत पावस पडपाचो अदमास हवामान खात्यान उक्तायला. मजगतीं, आडवेळ्या पावसाचे प्रमाण फोंड्यां वाठारांत सगळ्यांत चड म्हळ्यार 132.8 मिमी (5.22 इंच) आसा. मंगळारा दाबोळे सगळ्यांत चड 31.8 मिमी पावसाची नोंद जाल्या.
येत्या तीन दीस (शुक्रार मेरेन) गडगड्या सयत पावसाचो अदमास हवामान खात्यांन उक्तायला. तशेंच राज्याचे चडांत चड तापमान 34 ते 36 अंशां मदीं आसतलें, असो अदमास हवामान खात्यान उक्तायला.
राज्यांत शेनवार सावन आडवेळ्या पावसाक सुरवात जाली. शेनवारा उपरांत आयतारा पसून पावस पडलो. शेनवारच्या तुळेंत आयतार आनी सोमारा पावसाचे प्रमाण उणें आशिल्ले. मंगळारा पावसाचे प्रमाण चड आशिल्ले. फांटले चार दीस सांजे 6 उपरांत सेगीत पावसाच्यो सरी पडटा. सदांच पावस आसलो तरी तापमानाचेर हाचो परिणाम जावंक ना. चडांत चड तापमान 35 अंशां फुडें आसा. मंगळारा दाबोळे (31.8 मिमी) आनी फोंड्यां (28 मिमी) पावसाची नोंद जाली. साखळे 17.4 मिमी, वाळपय 9.7 मिमी पावसाची नोंद जाल्या. पावसाक लागून लायटीचो आपालिपा सुरूच आसा.

आतां मेरेनचो आडवेळो पावस (1 मार्च उपरांतचो)

म्हापशें 4.4
पेडणें 5.2
फोंडें 132.8
पणजी 101.2
साखळी 26.4
वाळपय 74.6
दाबोळी 63.4
मडगांव 6.3
मुरगांव 42.0
केपें 45.4
सांग्यार 29.3