भांगरभूंय | प्रतिनिधी
घुवळे वखदां विरोधी पंगडाची कारवाय
म्हापशें, प्रतिनिधी: गोंय पुलिसांच्या घुवळे वखदां विरोधी पंगडान आयज एके नायजेरियन बायलेक १५० ग्रॅम एम्फेटामाइ सयत अटक केली. फेथ चिमेरी (२४) अशें हे बायलेचें नांव जावन आसा.
मेळिल्ले म्हायती प्रमाण, फेथ चिमेरी ही नायजेरियन महिला बंगळुरूच्यान गोंयांत आयिल्लें आंतरराज्यीय बसींतल्यान ग्रीन पार्क हॉटेल, गिरी म्हापश्यां आयली. थंय सांपळो रचून राविल्ल्या घुवळे वखदां विरोधी पंगडान तिका ताब्यांत घेतली. तिच्या सामानची तपासणी केली तेन्ना तिचे कडेन वट्ट १५.१० लाख रुपयांचो १५० ग्राम म्फेटामाइन तशेंच १०० ग्राम गांजो सांपडलो. खोलायेन चवकशी केल्या उपरांत तिणें आपूण बंगळुरूच्यान गोंयांत ह्या मालाची पुरवण करपाक आयिल्ल्याचें सांगलें.
ही बायल भारतांत विद्यार्थी व्हिसाचेर लखनौ विद्यापीठांत शिकपाक आयिल्ली. मात ती केन्नाच लखनौ वचूंक ना. बंगळुरूच रावन तिणें घुवळे वखदांचो वेवसाय चलयलो, अशी म्हायती उत्तर गोंय पुलीस अधीक्षक अक्षत कौशल हांणी पत्रकार परिशदे वेळार दिली.
मजगतीं, कांय दिसां पयलीं अँटी नार्कोटिक सेलान बोरी-फोंडेंच्या हायड्रोपोनीक गांजाच्या प्रयोगशाळेचेर एका तरणाट्याक गांजाचे लागवडी प्रकरणांत अटक केल्ली. गोंयांत घुवळे वखदांच्या वेपाराक आळो घालपा खातीर घुवळे वखदां विरोधी पंगडान अंदूं वर्सा ३.७७ कोटी रुपयांचीं घुवळे वखदां जप्त केल्यांत. तशेंच थळावे, भारतीय आनी परदेशी नागरिकां सयत ९ जाणांक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
