दोंगरेर धाकलें भाटांत पिवपाचें उदक सुरक्षित, भलायकी खात्याचो अहवाल

भांगरभूंय | प्रतिनिधी

उदकाची पुरवण सुरू, भियेवपाची गरज नाः विरेश

पणजी, प्रतिनिधीः दोंगरे धाकलें भाटांत पियेवपाचें उदक आतां सुरक्षित आसा. भलायकी खात्यान हें उदक पियेवपा सारकें आसा अशें अहवालात म्हणलां. आयज सांजे मेरेन उदकाची पुरवण जातली, अशें आमदार विरेश बोरकार हांणी सांगलें. ते बरोबर दोंगरेची मुखेल पायपां आसात तीं खूबच पोरणीं जाल्यात तीं बदलपा खातीर बेगीनूच पावलां उबारतले, अशेंय विरेश हांणी सांगलें.
5 मेंक दोंगरेर नळांतल्यान येवपी उदक दुशित जावन थळाव्यांक कीडी सांपडिल्ल्यो. उपरांत दुशित उदकाची पुरवण सगळ्या गावांक जावची न्हय आनी थळाव्यांची भलयाकी इबाडची न्हय म्हूण बांदकाम खाते आनी भलायकी खात्यान पावलां उबारपाक सुरवात केली. काल रातीं उसरां मेरेन धाकलें भाटांत दुशित उदकाची पुरवण करपी पायपांत उदकाचे प्रेशर मारून तीं नितळ केलीं. ते भायर दोंगरेंत टांकयेंतल्यान उदकाची पुरवण जावपी मुखेल पायपांत सीज व्हाॅल्व्ह घालून धाकले भाटांतली उदकाची पुरवण बंद दवरून व्हडले भाटांत पुरवण चालू दवरिल्ली. थळाव्यांक टँकर आनी बांयच्या उदकांचेर निबूंन रावचे पडटाले, देखून थळाव्यांचे हाल जाल्ले.
बांदकाम खात्यान मंगळारा अहवाल दिला. हे उदक पियेवपा सारकें आसा अशें तांणी सांगलां. आमी फक्त भलायकी खात्याच्या अहवालांक राविल्ले. तांणी घराघरांनी वचून सर्वेक्षण केले आनी उदकाची सॅम्पलां घेतलीं. ते भायर काल रातीं मेरेन उदकाचो प्रेशर मारून सगळ्यो पायपलायनी नितळ केल्यात. बुधवारा भलायकी खात्यान बायोलोजिकल अहवाल दाखयला. हे उदक वापरा योग्य आसा अशें अहवालांत म्हणलां, अशी म्हायती विरेश हांणी दिली.
बांदकाम खाते आनी भलायकी खात्यान दिल्लीं सगळीं सॅम्पलां सकारात्मक आसात. हें उदक वापरूं येता अशें भलायकी खात्यांन म्हणलां. बुधवारा सांजे 5.30 वरां मेरेन दोंगरे धाकले भाटांत उदकाची पुरवण जातली. हे उदक सुरक्षित आसा भियेवपाची गरज ना अशें विरेश हांणी सांगलें.
उदक दुशित जाल्ल्यान लोकांनी जें पासियेंस काडलां आनी त्रास सोंसल्यात तांकां लागून हांव दिलगिरी उक्तायतां. उदकाची पुरवण बेगीनूच सुरळीत जावची म्हूण हांव, सरपंच, पंच वांगडी आनी बांदकाम अधिकारी फांतोडेर 4.30 मेरेन वावुरताले. जे मेरेन ही पायपलायन उदकाच्या प्रेशरांचेर नितळ जायना तो मेरेन उदकाची पुरवण करप शक्य नासलें, अशें विरेश हांणी सांगलें.