पाकिस्ताना परस भारतांत रावपाक चड आवडटा

भांगरभूंय | प्रतिनिधी

आयएएस अधिकारी मराळकार हांणी सांगलो तरणाट्याचो अणभव

पणजी, बातमीदार ः लडाखांतल्या तूर्तुत ह्या शिमे वयल्या गांवांत रावपी गोबा अली हांणी एक वेगळोच अणभव घेतलो. झुजाक लागून आवय- बापाय पसून वेगळो जाल्लो आनी उपरांत सुमार 10 म्हयने पाकिस्तानांत रावून आयल्लो गोबा हाका पाकिस्ताना परस भारतांत रावपाक चड आवडटा. गोंयकार आयएएस अधिकारी, केंद्रीय अन्न आनी भौशीक पुरवण खात्याचे अवर सचीव यतींद्र मराळकार हांणी हो अणभव सांगलो.
थांग वाठारांतली तुर्तुक ही भारताची निमाणी आऊटपोस्ट. सियाचीन ग्लेशीअराक वचपाक हो मार्ग वापरतात. फाळणी उपरांत तुर्तुक गांव पाकिस्तानांत गेलो. 1971 च्या भारत- पाकिस्तान झुजा उपरांत तें परतून भारताच्या ताब्यांत आयलें. ह्या वेळार पांच वर्सां पिरायेच्या गोबा अलीचे आवय-बापूय तुर्तुकासावन 2 किमी अंतराचेर जनावरांक चरपाक घेवन गेल्ले. पूण झुजा उपरांत गोबा, ताचो भाव आनी आजो भारतांत आशिल्ले. पूण ताचे आवय- बापूय पाकिस्तानांत रावले. आज्यान भारतीय सैन्याच्या आदारान दोनूय नातवांक व्हड केले.

गोबा हांणी आपल्या आवय- बापायक मेळपाक म्हूण जायते फावटीं पाकिस्तानाक भेट दिवपाची परवानगी मागिल्ली. उपरांत निमाणे 2014 वर्सा तांका ती मेळ्ळी. धा म्हयने पाकिस्तानांत रावन गोबा भारतांत परतलो. पूण तांकां पाकिस्तान आवडलें ना. थंय तांका वायट अणभवाक तोंड दिवचें पडलें. थंय कायदो आनी न्याय ना हें तांकां कळ्ळें.
उरफाटें भारतांत वेगवेगळ्या धर्मांतले लोक शांततायेन रावतात अशें तांकां आयज लेगीत दिसता. ताणें सर्वधर्म समभाव हे कल्पनेचेर आदारून आपल्या घरा लागीं एक ल्हानशी बाग तयार केल्या. हांगा विंगड विंगड प्रकारचीं झाडां लायल्यांत. हे बागेक ताणें ‘ब्युटीफुल इंडिया’ म्हळ्यार ‘सोबीत भारत’ अशें नांव दिला. तुर्तुक गांवांतल्या लोकांक पाकिस्ताना परस भारत चड आवडटा अशें मराळकार हांणी सांगलें.

आवय पुताक दुर्बिणींतल्यान पळयताली
गोबा पाकिस्तानांतल्यान परत येताना ताचे आवयन ताका धवे कपडे घालून दर शुक्रारा शिमेचेर येवपाक सांगिल्लें. शिमेचेर पावतकच तांची आवय तांकां दुर्बिणींतल्यान पळोवन समाधान मानताली. आवयच्या मरणा मेरेन दर शुक्रारा धवे कपडे घालून ते शिमेचेर वताले अशें मराळकार हांणी सांगलें.

भारतीय सैन्य हेंच आवय – बापूय
गोबा हो एक कवी. भारत आनी भारतीय सैन्याचो तांका खासा अभिमान आसा. ही भावना ताणें आपल्या कवितेंतल्यान उक्तायल्या. भारतीय सैन्य हेंच तांचे आवय- बापूय. ते खंयच्याय प्रसंगाचेर भारता खातीर बळी दिवपाक तयार आसात अशें मराळकार हांणी सांगलें.