भांगरभूंय | प्रतिनिधी
पेडणें, प्रतिनीधी: आदले मुख्यमंत्री प्राचार्य लक्ष्मीकांत पार्सेकार हांकां पार्सेंच्या थळाव्या नागरिकांच्या सहकार्यान आगरवाडो चोपड्यां वाया पार्से, तुयां ते पेडण्यां मेरेनच्या रस्त्याचें रुंदीकरण बरे तरेन करपाक येस आयिल्लें. मात हे रस्ते सध्या धोको निर्माण करतात. सध्या तुयेंच्या वीज विभागीय केंद्राच्या मुखार आशिल्लें रस्त्या वयलें फोंडकूल कोणाचो तरी जीव घेवं शकता. हांगा कोणायचो जीव वयचे पयलीं रस्त्याची दुरुस्ती आनी डांबरीकरण करपाची मागणी आदले जिल्हो पंचायत वांगडी दिपक कळंगूटकार हांणी केली.
श्री. कळंगूटकार हांणी म्हायती दितना सांगलें, प्रा पार्सेकार आनी पार्सेच्या नागरिकांच्या सहकार्यांतल्यान पार्सेचो रुंद करपाक अशक्य आशिल्लो रस्तो त्या काळांत रुंद केल्लो. तशेंच चोपडें वाया पार्श्यां, तुयां ते पेडण्यां मेरेनचो रस्तो बरो तयार जाल्लो. मात सध्या ह्या रस्त्याची स्थिती पळयल्या उपरांत बांदकाम खातें कितलें जागृत आसा हें दिसून येता. ह्या रस्त्या कुशीक फाटल्या पावसांतूच जमनी पोंदच्या लायटीच्यो वायरी घालपाचें काम सुरू केलां. मात ते रस्ते अजूनय वेवस्थीत डांबरीकरण करूंक ना. ताचे परिणाम सध्या लोकांक भोगचे पडटात. सगळे कडेन अपघात जावन लोक जखमी जावपाक लागल्यात. कांय जाण मेल्यातूय बी. तरीय सरकाराक कशी जाग येना? असो प्रस्न श्री. कळंगूटकार हांणी केलो.
तुयेंच्या उपविभागीय वीज केंद्रा मुखार जें धोको निर्माण करपी फोंडकूल आसा तें फोंडकूल तरी वीज विभागान दुरुस्त करपाक सरकारा मुखार यत्न करचे, अशें तांणी सांगलें.
मांद्रें मतदार संघांत विजेची समस्या कायम
मांद्रें मतदार संघांतली विजेची समस्या कायमची सोडोवपाक वीज विभागान आनी गोंय सरकारान शंभर कोटी परस चड निधी मंजूर केल्लो. ते प्रमाण वीज खात्यान पेडण्यां, तुयां, पार्से, चोपड्यां, मांद्रें हांगा जमनी पोंदच्यान वीज केबल घालपा खातीर रस्ते खणिल्ले. सरकारान जर ह्या रस्त्यांचें वेळार डांबरीकरण केल्लें जाल्यार आयज ह्या रस्त्यांचीं अवस्था अशी जावची नासली अशेंय तांणी फुडें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
