भांगरभूंय | प्रतिनिधी
एमएसडब्ल्यूच्या विद्यार्थ्यांक एनजीओ सयत काम करपाची संद
पणजी, प्रतिनिधी ः गोंय विद्यापीठाच्या मास्टर ऑफ सोशल वर्क (एमएसडब्ल्यू) अभ्यासक्रमाच्या विद्यार्थ्यांक एनजीओ सयत काम करून प्रत्यक्ष कामाचो अणभव घेवपा खातीर गोंय विद्यापीठान एनजीओ कडेन सामंजस्य कबलात केल्या. करितास, बुकवर्म, लायफ लायन फाउंडेशन, विहाग ह्या एनजीओ कडेन विद्यापीठान कबलात केल्या.
गोंय विद्यापीठाच्या मनोहर पर्रीकार कायदो म्हाविद्यालयान मास्टर ऑफ सोशल वर्क अभ्यासक्रम सुरू जाला. शिक्षण, भलायकी, एडस प्रतिबंद, दिव्यांग भुरग्यांची उदरगत ह्या मळार हे एनजीओ वावुरतात. एमएसडब्ल्यूच्या विद्यार्थ्यांक कामाचो अणभव मेळचो, हो ह्या कबलाती फाटलो हेत जावन आसा. राज्यांतल्यो संस्थां तशेंच समाजा कडेन संबंद जोडपाचे गोंय विद्यापीठाचे यत्न आसा. एनजीओ कडेन केल्ल्यो कबलाती हो ह्या यत्नांचो भाग आसा अशें गोंय विद्यापीठान म्हणला.
ही म्हायती गोंय विद्यापिठाचे सहाय्यक सचीव जनसंपर्क शशिकांत मोरजकार हांचे कडल्यान मेळ्ळ्या. सामंजस्य कबलाती करताना करितास संस्थेचे फादर मेवरिक फर्नांडिस, लायफ लायन फाउंडेशनाचे नारायण नंदिवाले, विहागचे विकास कुलकर्णी, बुकवर्मचे थोमस सिमोयस, गोंय विद्यापीठाचे कुलसचिव प्रा. व्ही. एस. नाडकर्णी, प्रा. वसुधा सावयकार हजर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
