भांगरभूंय | प्रतिनिधी
वेंगुर्लें ः सध्या राज्यांत उश्णताय बरीच वाडल्या देखून कुडीक कांय प्रमाणात थंडसाण मेळची अशें सगळ्यांकूच दिसता. हे खातीर लोक दर्यादेग, न्हंयो, तळीं अशा सुवातींनी न्हावपाक वतात. अशा वेळार जायते फावटीं उदकाचो अदमास येना आनी जायत्या जाणांक जीव वगडावचो पडटा.
अशीच एक घडणूक काल 14 मे दिसा वेंगुर्लेंचे मांडवी खाडीं दर्यादेगेर घडली. दर्यात दोग जाण न्हावपाक देंवले पूण दोगांकूय उदकाचो अदमास येवंक नाशिल्ल्यान दोगूय बुडले. पूण तातूंतल्या एकल्याक वाटोवपाक नुस्तेकार दाजी बटवलकार हांका येस आयले. जाल्यार बेपत्ता आशिल्ल्या यश देऊलकार हाची कूड आयज मेळ्ळी.
मेळिल्ले म्हायती प्रमाण सध्या खोर्ली – म्हापशें हांगा रावपी मुळ मोरगांव दोडामार्गचो यश देऊलकर (16) हो तळेवडींतल्या आपल्या सोयऱ्यां वांगडा वेंगुर्ले हांगा भोंवडेर गेल्लो. यश म्हापश्यांतल्या सारस्वत विद्यालयांत शिकतालो. ताणें अंदूं धावेची परिक्षा दिल्ली आनी आयज ताचो निकाल आशिल्लो. पूण ताचे आदींच ताका मरण आयले. ताच्या अचकीत मरणाक लागून ताच्या कुटुंबांत दुख्ख पाताळलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
