कोलेस्ट्रॉल वाडटा? सकाळच्यो ह्यो संवयो घालून घेयात.

भांगरभूंय | प्रतिनिधी

कुडींत कोलेस्टेरॉल वाडूंक लागल्यार जायत्यो समस्या निर्माण जातात. शिरांनी कोलेस्टेरॉल जावप हें सामकें त्रास दिवपी आसता आनी चड करून रगत प्रवाहूय इबाडटा. मात सकाळच्यो कांय संवयो अश्यो आसात ज्यो उच्च कॉलेस्टर्रेल सुदारपाक मजत करतात. त्यो खंयच्यो हें पळोवया:

संत्रांचो रोस पियेवप – दर दिसा सकाळीं ताजें संत्रांचो रोस एक पेलो पिल्यार कोलेस्टेरॉलाची पातळी उणी जातली. कारण संत्रांत फ्लॅव्होनॉयड भरपूर आसता, जें एलडीएल कोलेस्टेरॉलाची पातळी उणी करपाक मदत करता. एका अभ्यासा प्रमाण चार सप्तकां दर दिसा ७५० मिलिलीटर संत्रांचो रोस पिल्यार कोलेस्टेरॉलाची पातळी खूब उणी जावंक शकता.

ग्रीन टी – ग्रीन टींत कॅटेचीन नांवाचे अँटीऑक्सिडेंट भरपूर आसतात, जे एलडीएल कोलेस्टेरॉलाची पातळी उणी करतात. तुमच्या सदच्या कॉफी बदला एक कप ग्रीन टी घेवन तुमची सकाळ सुरू करात. एका अभ्यासा प्रमाण ग्रीन टी नेमान पिल्यार एलडीएल कोलेस्टेरॉलाची पातळी उणी जाता.

ध्यानाक वेळ काडचो – सकाळीं ध्यान केल्यार ताण उणो करपाक मदत जातली. अशें केल्यार एलडीएल कोलेस्टेरॉलाची पातळी उणी जावपाक शकता. देखून ध्याना खातीर १० मिनटां घेयात. एका अभ्यासा प्रमाण माइंडफुलनेस मेडिटेशनाचो सराव केल्यार एलडीएल कोलेस्टेरॉलाची पातळी उणी जाता.

पुश्टीक नाश्तो – पुश्टीक नाश्त्यान दिसाची सुरवात केल्यार कोलेस्टेरॉलाची पातळी उणी करपाक मदत जाता. देखून विरगळपी चड फायबर आशिल्लें अन्न खावचें, जशें ताज्या फळां वांगडा ओटमील वा ब्रोकोली वांगडा पुराय धान्याचो टोस्ट. विरगळपी तंतू एलडीएल कोलेस्टेरॉलाची पातळी उणी करपाक मदत करता. एका अभ्यासा प्रमाण दिसाक फकत ५ ते १० ग्राम विद्राव्य फायबर खाल्यार एलडीएल कोलेस्टेरॉल सुमार ५% उणें जाता.

सकाळीं व्यायाम करचो – सकाळीं व्यायामाक लागून एचडीएल कोलेस्टेरॉलाची पातळी वाडोवपाक आनी एलडीएल कोलेस्टेरॉलाची पातळी उणी करपाक मदत जाता. देखून सकाळीं आनी सांजवेळार वेगान पासय मारची वा पार्कांत भोंवपाक वचचें. दर दिसा सकाळीं उण्यांत उणें ३० मिनटां व्यायाम करचो.