भांगरभूंय | प्रतिनिधी
दिल्ली कॅपिटल्सान इंडीयन प्रिमीयर लिगेचे (आयपीएल) आपले निमाणे मॅचींत लखनौ सुपर जायण्ट्साक 19 धांवड्यांनी हारयलो. दिल्लीन 4 बाद 208 धांवड्यो केल्यो, ताका जाप दितना लखनौक 9 विकेटी व्हगडावन 189 मेरेन मजल मारप शक्य जालें.
ह्या जैता सयत दिल्लीन प्ले ऑफांत सुवात मेळोवपाची आपली आस्त कायम राखली. पूण, ताच्या ह्या जैतान राजस्थान रॉयल्साची प्ले ऑफांतली सुवात निश्चीत जाली. राजस्थान रॉयल्साचे 12 मॅचींतल्यान 16 गुणां सयत गुणतकट्यांत दुसरे सुवातेर आसा. दिल्लीन जैत मेळयिल्ल्यान लखनौक 16 गुणां मेरेन पावपा पसून आडायलो. ताका लागून सनरायझर्स हैदराबाद आनी चेन्नय सुपरकिंग्स हे दोनूय पंगड 16 गुणां मेरेन पावपाक शकतात.
मजगतीं, ईशांत शर्मान पांचव्या बॉलाचेर मुखेली लोकेश राहुलाक (5) बाद केलो. मुकेश कुमारान ताची उत्कृश्ट कॅच धरली. ते उपरांत क्विंटन डी कॉकाक (12) बाद केलो. लखनौच्यो विकेटी पडत चालूच उरल्यो. अक्षर पटेलान चवथे ओव्हरींत मार्कस स्टॉयनीसाक (5) बाद केलो. पूण, निकोलस पुरनान कांय आकर्शक शॉर्ट मारून लखनौचें चेपण उणें केलें. दुसरे वटेन इशांतान आपली तिसरी विकेट घेतली. ताणें दीपक हुडाक बाद करून दिल्लीक चवथें येस मेळोवन दिलें.
निकोलस पुरन (61) आनी सकयले सुवाते वयलो अर्शद खान (58) हांकां सोडले जाल्यार हेरांनी निर्शेणी हाडली आनी लखनौक 19 धांवड्यांनी हार घेवची पडली.
ते आदीं अभिषेक पोरेल आनी शाई होप हांच्या आक्रमक बॅटिंगेक लागून दिल्ली कॅपिटल्स पंगडाक मॅचींत घटमूट स्थितींत हाडलो. लखनौ सुपर जायण्ट्सान पयले ओव्हरींत जॅक फ्रेझर मॅकगर्काक बाद केलो. पूण, अभिषेक आनी होप हांणी 92 धांवड्यांची भागिदारी केली. लखनौच्या बॉलरांनी मदल्या ओव्हरींनी दिल्लीच्या बॅट्समनांक बांदून दवरिल्ले. पूण, ऋषभ पंत आनी त्रिस्तान स्तब्स हांणी अखेरच्या ओव्हरींनी विस्फोटक बॅटींग करून दिल्ली कॅपिटल्साक बरो स्कोर उबारून दिवपाक मजत केली.
लखनौ सुपर जायण्ट्साचो मुखेली लोकेश राहुलान टॉस जिखून दिल्ली कॅपिटस्साक पयलीं बॅटींग करपाचें आमंत्रण दिलें. पयलेच ओव्हरींत आक्रमक बॅटींग करपी जॅक फ्रेझर मॅकगर्काक (0) अर्शद खानान बाद केलो. पूण, अभिषेक आनी होप हांणी डाव सांबाळ्ळो.
अभिषेकान 21 बॉलांनी अर्द शेंकडो पुर्ण केलो. अखेरेक रवी बिश्नोईन ही जोडी फोडली. ताणें होपाक (38) कॅच बाद केलो. होपान बाद जावचे पयलीं अभिषेका वांगडा 49 बॉलांनी 92 धांवड्यांची भागिदारी केली. राहुलान जबरदस्त कॅच धरली.
होप बाद जाल्या उपरांत दिल्लीचे धांवसंख्येक ब्रेक लागलो. ताचें चेपण अभिषेकाचेर आयलें. धांवगती वाडोवपाच्या यत्नांत तो बाद केलो. नवीन उल हकाच्या बॉलाचेर पूल शॉर्ट मारपाच्या यत्नांत निकोलस पुरनाक कॅच दिवन तो परतलो. अभिषेकान 33 बॉलांनी पांच चवके आनी चार सक्यांचे मजतीन 58 धांवड्यो केल्यो.
खेळपट्टीचेर पांय रोविल्लो बॅट्समन बाद जाल्या उपरांत दिल्लीची सरासरी उणी जाली आनी तांकां 8 ते 13 ह्या पांच ओव्हरींनी 2 बाद 33 धांवड्यो करप शक्य जाल्यो. बिश्नोईन चार ओव्हरींनी 26 धांवड्यो दिवन 1 विकेट घेतली. ताचो कोटा सोंपल्या उपरांत पंतान मेकळेपणान बॅटींग करपाक सुरवात केली. 15 ओव्हरींनी दिल्लीन 3 बाद 136 धांवड्यो केल्यो. धांवड्यांचो दोंगर उबारपाची सगली भिस्त पंताचेर आशिल्ली. पूण, ताच्या हातांतल्यान सेगीत बॅट सुट्टना दिसलें. 17वे ओव्हरींत तो बाद जालो. नवीनाचे बॉलिंगेचेर दीपक हुडान धरलो. पंत 33 धांवड्यो करून तंबूंत परतलो. बाद जावचे पयलीं स्तब्सा वांगडा 47 धांवड्यांची भागिदारी केली. स्तब्सान 22 बॉलांनी अर्द शेंकडो पुर्ण केलो.
20वे ओव्हरींत रवी बिश्नोईन दोन कॅची सोडल्यो. अक्षर पटेलान नाबाद 14 धांवड्यो केल्यो. स्तब्सान 25 बॉलांनी तीन चवके आनी चार सक्यां सयत नाबाद 57 धांवड्यो केल्यो. दिल्लीन 4 विकेटी व्हगडावन 208 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
