भांगरभूंय | प्रतिनिधी
आडकल्ले बायलेक आनी दादल्याक वाटायलो
वाळपय: फाटल्या चार दिसां सावन सत्तरी म्हालांत सैमीक पडझडीच्यो घडणुको घडत आसात. चार दिसां मदीं वट्ट बारा घडणुको घडल्यात. काल (मंगळारा) वाळपय मामलेदार कचेरे कुशीक आशिल्ल्या गुलमोहराचें झाड पडलें. हें झाड पडिल्ल्यान स वाहनांचें लुकसाण जालें. तातूंत आडकल्ले बायलेक आनी एका दादल्याक उजो पालोवपी दळाच्या जवानांनी सुखरू भायर काडले. नाजाल्यार अनुचीत प्रकार घडपाचो. ही घडणूक दनपारां 12.30 वरांच्या सुमाराक घडली.
वाळपय मामलेदार कचेरे कुशीक खूबशीं गुलमोहराची झाडां आसात. तेच प्रमाण हेर घातक झाडां आसात. काल दनपारां 12.30 वरांच्या सुमाराक अचकीत झाड पडिल्ल्यान पार्क करून दवरिल्लीं स वाहनां तातूंत चिड्डलीं. हातूंत पांच दुचाकी आनी मोटारीचो आस्पाव आसा. ज्या वेळार ही घडणूक घडली त्या वेळार ह्या मार्गा वेल्यान लोकांची वर्दळ नाशिल्ली. नाजाल्यार वायट घडणूक घडपाची शक्यताय लोकांनी उक्तायली.
मजगतीं, मेळिल्ले म्हायती प्रमाण ज्या वेळार झाड पडलें त्यावेळार ह्या मार्गा वेल्यान प्रशिला मांद्रेंकार ही बायल आनी अभय म्हातो हीं दोगांय वतालीं. अचकीत झाड पडिल्ल्यान तीं तातूंत आडकलीं. हाका लागून एकूच खवदळ पडलो. तांणी बोवाळ घालो. रोखडेंच उजो पालोवपी दळाच्या जवानांनी धांव घेवन तांकां भायर काडले.. तांकां किरकोळ दुखापत जाली.
हें गुलमोहराचें झाड वीज वाहिन्यांचे कुशीक आशिल्लें. ज्या वेळार तें पडलें, त्या वेळार वीज वाहिन्यांच्या सरयो सकयल पडल्यो. ह्यो सरयो जिव्यो आशिल्ल्यो. सुदैवान कोणाकूच दुखापत जाली ना. नाजाल्यार वायट प्रसंग घडपाची शक्यताय आशिल्ली. उजो पालोवपी दळाच्या जवानांनी वीज कचेरे कडेन संपर्क सादून तांकां वीज प्रवाह बंद करपाची विनंती केली. तांणी घडणूक थळार धांव घेवन विवीध प्रवाह बंद केले. उपरांत वीज वाहिन्यांचेर आडकल्ल्या झाडांचे खांदे मारून उडयले.
मजगतीं, हे घडणुकेक लागून वट्ट पांच दुचाकी आनी एक चार चाकी वाहनांचें लुकसाण जालें. ह्या वाहनांचेर झाडांचें खांदे पडिल्ल्यान लुकसाण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
