भांगरभूंय | प्रतिनिधी
वास्को: सांकवाळ पंचायतीच्या प्रभाग दोनांतल्या सावळफोंड वाठारांतल्या नियोजीत मेगा हावसींग प्रकल्पाचे सुवातेंतलीं झाडां मारपाक आयिल्ल्या कामगारांक थळाव्यांनी विरोध केल्ल्यान परतून वच्चें पडलें. ह्या मेगा हावसींग प्रकल्पाक कांय पंच वांगड्यांचो आनी थळाव्यांचो विरोध आसलो तरी सांकवाळ पंचायतीन गडबडीन परवानगी दिली.
ह्या प्रकल्पा खाला 650 फ्लॅट, 70 व्हिला आनी पांच स्विमींग पूल बांदपाचे आसात. ह्या प्रकल्पाक 2007 आनी 2015 वर्सा कांय पंच आनी थळाव्यांनी विरोधी केल्लो. ताका लागून ह्या प्रकल्पाचें काम मुखार वचूंक नाशिल्लें. आतां पंचायतीन सदर प्रकल्पाक पाचवो बावटो दाखयला. ह्या प्रकल्पा खातीर सांकवाळ पंचायत, मुरगांव नियोजन आनी विकास प्राधिकरण हांचे परवाने मेळ्ळ्यात.
मजगतीं पर्यावरण दाखलो, भलायकी दाखलो तशेंच हेर संबंदीत दाखले मेळूंक नाशिल्ल्याचो दावो थळावे करतात.
दोन म्हयन्यां पयलीं थळाव्यांनी प्रकल्पाचे सुवातेंत एकठांय येवन विरोध केल्लो. उपरांत काल (मंगळारा) संबदीत सुवातेंत कांय झोंपा मारपा खातीर पांच-स कामगार थंय आयले. तांणी कामाक सुरवात केले उपरांत थंय ल्हवू ल्हवू थळावे एकठांय जावंक लागले. तांणी त्या कामगारांक काम बंद करपाची विनंती केली. त्या कामगारांक परिस्थितीची जाणीव करून दिले उपरांत थंयच्यान ते गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
