भांगरभूंय | प्रतिनिधी
लोकांक टँकर आनी बांयचेर रावचें पडटा निंबून
फोंडें: धारबांदोडें म्हालांतल्या सांकड्डें वाठारांतल्यान व्हांवपी रगाडा न्हंयचे उदक आटिल्ल्यान वाठारांतल्या लोकांक टँकर तशेंच बांयच्या उदकाचेर निंबून रावचें पडटा. ताका लागून जाण्ट्यां बायलांक बांयचें उदक काडटना त्रास जायत आशिल्ल्याचें दिसून आयलें. पावस सुरू जाय मेरेन प्रकल्प बंद दवरपाची शक्यताय आसून ते खातीर बांदकाम खात्यान लोकांक टँकरा वरवीं उदकाची पुरवण करपाचो यत्न सुरू केला.
सांकोड्डें पंचायत वाठारांतल्यान व्हांवपी रगाडा न्हंयच्या उदकाची पातळी उणी जाल्ल्यान मदलोवाड्या वेलो एक प्रकल्प फाटल्या शेनवारा सावन बंद दवरला. ताका लागून सुर्ला, बाराभूमी, मदलावाडो, बट्टर, धारगें, तळडें, तांबडीसुर्ला आनी काऱ्यामळ ह्या वाठारांनी उदकाची पुरवण बंद जाल्या. फाटल्या शेनवारा सावन बांदकाम खात्या वतीन लोकांक टँकरा वरवीं उदकाची पुरवण करतात. टँकराचें उदक उणें मेळत आशिल्ल्यान बायलांनी गांवांतले बांय कडेन धांव घेतल्या. बट्टर सारक्या गांवांत बांयचें उदक व्हरपा खातीर दीसभर बायलांची गर्दी पडटा. सोमारा सकाळीं सरपंच प्रिया खांडेपारकार आनी हेर पंच वांगाड्यांनी बांदकाम खात्याचे सहाय्यक अभियंतो देविदास बोरकार हांची भेट घेवन टँकराच्यो फावटी वाडोवपाची मागणी केली. ते प्रमाण सोमारा सावन टँकराच्यो फावटी वाडल्यात.
पानस-सांकोड्डेंच्या उदका प्रकल्पांतल्यान बाराभुमी वाठारांत सोमारा उदका पुरवण सुरू केली. मदलोवाड्या वेलो प्रकल्प फाटल्या वर्सा सुरू केले उपरांत बाराभुमी गांवांतल्या लोकांक पानस हांगासरल्या उदका प्रकल्पांतल्यान उदका पुरवण बंद केल्ली. तेच बरोबर लोकांक उदका पुरवण सुरळीत करपा खातीर पानस हांगासरल्या उदका प्रकल्पांतल्यान रातीं 11 वरां मेरेन उदका पुरवण सुरू दवरली. सोमारा रातीं उसरां प्रकल्पांतल्यान उदका पुरवण सुरू आसतना वट्ट 3 सुवातांनी उदकाच्यो वाहिन्यो फुटपाचे प्रकार घडले. मंगळारा सकाळीं बांदकाम खात्याच्या कर्मचाऱ्यांनी वाहिन्याची दुरुस्ती करून दिले उपरांत लोकांक उदकाची पुरवण सुरू जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
