भांगराच्यो बिस्किटी चोरप्याक अस्तंत बंगालांतल्यान अटक

भांगरभूंय | प्रतिनिधी

दुसऱ्याचो सोद सुरू; चारांतल्यो तीन बिस्किटी जप्त

म्हापशें: साळपें, कांदोळे फ्लॅट शिफ्टींग करतना आलमारींतल्यो चार भांगराच्यो बिस्किटी दोगां कामगारांनी चोरल्यो. हातूंतलो दुबावीत आरोपी इयाकूब मोंडल (अस्तंत बंगाल) हाका कळंगूट पुलिसांनी अस्तंत बंगालांतल्यान अटक केली आनी चोरयेंतल्यो 25 लाखांच्यो तीन बिस्किटी जप्त केल्यो. जाल्यार दुसरो दुबावीत फरारी आसा.

ही चोरयेची घडणूक फाटल्या 27 एप्रील दिसा घडिल्ली. कागाळदार नेन्सी डायस हांणी कळंगूट पुलिशेंत कागाळ दाखल केल्ली. कागाळदारान दुसरे कडेन घर घेतिल्लें. ताका लागून फ्लॅटांतलें सामान नवे सुवातेंत हालयताले. हे खातीर दोगां कामगारांची तांणी मजत घेतिल्ली. ह्या दुबावितांनी सामान हालयतना भांगराची बिस्कीट आशिल्ली पोती चोरली. हे पोतयेंत चार बिस्किटी आशिल्ल्यो.

कागाळ दाखल जातकच पुलिसांनी चवकशी केली तेन्ना दुबावीत आरोपींनी आपल्या मूळ गांवां अस्तंत बंगालांत धांव मारिल्ल्याची म्हायती मेळ्ळी. ते प्रमाण पुलीस पंगड अस्तंत बंगालांत दाखल जालो. थंय सावन कुमारगंज पुलिसांचे मजतीन कळंगूट पुलिसांनी दुबाविताक धारलो उपरांत ताच्या बल्टा, जखीरपूर हांगासरल्या घराचेर धाड घालून झडटी घेतली. थंय 25 लाख रुपया मोलाच्या चारां मदल्यो तीन भांगराच्यो बिस्किटी सांपडल्यो. चवकशे वेळार आनीक एक बिस्कीट दुसऱ्या फरार दुबाविता कडेन आशिल्ल्याचें दिसून आयलें. हो फरार दुबावीत इयाकूब हाचो सख्खो भाव आसा.

कळंगूट पुलीस पंगड मंगळारा 14 वेर दुबाविताक घेवन गोंयांत दाखल जाले आनी ताका वयल्या चोरयेच्या गुन्यांवा खाला रितसर अटक केल्या. पुलीस उपअधिक्षक विश्वेश कर्पे आनी निरिक्षक परेश नायक हांच्या मार्गदर्शना खाला उपनिरिक्षक अक्षय पार्सेकार, कॉन्स्टेबल गौरेश कारबोटकार आनी हरचंद्र बेतकेकार ह्या पंगडान ही कामगिरी केली.

पुलीस अधिक्षक अक्षत कौशल हांणी सांगलें. कागाळ दाखल जातकच कळंगूट पुलिसांच्या एका पंगडाची नेमणूक केली. तांत्रीक म्हायतीच्या आदारान दुबावीत अस्तंत बंगालांत आशिल्ल्याचें समजलें. ह्या पंगडान थंय वचून दुबावीत इयाकूब मोंडल हाका धरलो. दुबावीत हो भारत-बांगलादेश शिमे पसून पांचशें मिटराचेर राबित्याक आशिल्लो. 2016 सावन दुबावीत हो कागाळदाराक वळखतालो आनी तो अदीं मदीं कागाळदाराच्या घरा कडेन कामाक येतालो.