भांगरभूंय | प्रतिनिधी
म्हापशें : दाडाची वाडी- धारगळे म्हाल येरादारी रिक्शान दुचाकीक फाटल्यान धपको दिल्ल्यान दुचाकी चलोवपी देविदास उर्फ देवू कोनाडकार (४७) हाका मरण आयिल्लें. हो अपघात आयतारा रातच्या सुमार १०.३० वरांचेर घडलो. ह्या अपघाता उपरांत रिक्षा चालकान थंयच्यान पळ काडिल्लो. हो खून आशिल्ल्याचो दावो करून थळाव्या लोकांनी सुमार स वरां नागझर जंक्शना वयलो रस्तो आडायलो. ह्या प्रकरणांत पळून दोगांक वारखंड रस्त्याचेर पुलिसांनी अटक केल्ली. आयज ह्या प्रकरणाक एक वेगळें वळण आयलां. पुलिसांनी हें प्रकरण हीट अॅण्ड रन नासून खून आशिल्ल्याचें नोंद केलां.
मजगतीं, आरोपींनी आयतारा रातचो आपलो रिक्षा धोको निर्माण करपी अवस्थेंत पार्क केल्लो. हांगच्यान यो- वच करपी लोकांक ताचो बरोच त्रास जातालो. मजगतीं कोनाडकार हांणी रिक्षा चालका कडेन मदीं आशिल्लें वाहन काडचें म्हणून उलोवप केलें. तेन्ना रिक्षा चालकान ताचे कडेन वाद घातलो. उपरांत कोनाडकार आपले दुचाकींत थंयच्यान वतना रिक्षा चालकान आपल्या वांगड्यां सयत ताचो पाठलाव केलो. दाडाचीवाडी- धारगळे पावतांच तांणी कोनाडकार हांचे दुचाकीक नेटान धपको दिलो. कोनाडकार गाडये सयत २०-२५ मिटर झरकत गेल्ल्यान ताका मरण आयलें.
मजगतीं, पुलिसांनी ह्या प्रकरणा विशींचे तपासणेक आनीक नेट हाडून, तशेंच थळाव्यांचे मजतीन ही रिक्षा ट्रॅक केली आनी मोहित कुमार (१९) आनी अभिषेक कुमार (२०) ह्या दोगाय आरोपींक धरले. ह्या दोगांयनी मुद्दम हो अपघात घडयल्ल्याचें चवकशे वेळार कळ्ळें. ह्या प्रकरणांत आपलो गुन्यांव मान्य केल्या उपरांत धारगळ हिट अँड रन अपघाताची खून म्हणून नोंद जाली. कोनाडकार हांची कूड पोस्टमार्टमा उपरांत कुटुंबाचे सुवादीन केल्या.
पेडणेंचे उपविभागीय पोलीस अधिकारी जिवबा दळवी हांच्या मार्गदर्शनाखाला मोपाचे पुलीस निरीक्षक नारायण चिमुलकार, सचिन लोकरे आनी उपनिरीक्षक नवनीत गोलतेकार, आशिष पोरोब, प्रवीण शिमेपुरुषकार हांच्या पंगडान हे घडणुकेची सीसीटीवी फुटेज मेळोवपाक आनी आरोपींक धरपाक म्हत्वाचें काम केलां. उत्तर गोंय पुलीस अधीक्षक अक्षत कौशल,आयपीएस आनी उपविभागीय पुलीस अधिकारी जिवबा दळवी हांच्या मार्गदर्शना खाला पुलीस निरीक्षक सचिन लोकरे फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
