भांगरभूंय | प्रतिनिधी
19557 विद्यार्थ्यांनी दिल्या परीक्षा
पणजी, प्रतिनिधी : गोंय शालान्त मंडळान एप्रिलात घेतिल्ल्या धावेच्या परीक्षेचो निकाल फाल्यां 15 मेंक सांजे 5.30 वरांचेर पर्वरे मंडळाच्या परिशद घरांत जाहीर जातलो. 1 एप्रिल ते 24 एप्रिल मजगतीं जाल्लें हे परिक्षेक 19557 विद्यार्थी बशिल्ले.
शालान्त मंडळाच्या संकेतथळाचेर (www.gbshe.in ) परिक्षेचो निकाल उपलब्ध जातलो, अशें मंडळान कळीत केलां. विद्यार्थ्यांच्यो गुणपत्रिका वांटपाचें वेळापत्रक संकेतथळाचेर जाहीर जातलें. विद्यालयाच्या लोगिनाचेर 17 मे दीसा दनपारां 2 उपरांत गुणपत्रिका डावनलोड करपाची सुविधा उपलब्ध जातली.
1 एप्रिल ते 24 एप्रिल 2024 मेरेन 31 केंद्रांनी धावेची परिक्षा जाल्ली. 9743 विद्यार्थी आनी 9814 विद्यार्थीनींनी ही परिक्षा दिल्ली. चले आनी चलयो मेळोन 19557 विद्यार्थी परिक्षेक बशिल्ले. हे भायर पयली नापास जाल्ले 242 आनी 385 खासगी/आयटीआय विद्यार्थ्यांनी परिक्षा दिल्ली.
कोरोना उपरांत फांटली दोन वर्सां दोन सत्रांनी परिक्षा जाल्ली. फांटले वर्साचो निकाल विक्रमी म्हळ्यार 96.64 टक्के लागिल्लो. 2020 वर्सा वर्सुकी (निमणी एकूच) परिक्षा जाल्ली. 2020 वर्साचो निकाल 92.69 टक्के लागिल्लो. उपरांत कोरोनाक लागून दोन सत्रांचेर आधारीत परिक्षा घेवपाचो निर्णय मंडळान घेतलो. कोरोनाची म्हामारी सोंपले उपरांत अंदुं सावन पयलीची वर्सुकी परिक्षा घेवपाची पद्धत सुरू जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
