तापमानांत वाडः पणजी 36 अंश, मुरगांवांत 35.4 अंश सेल्सियस तापमान नोंद
भांगरभूंय | प्रतिनिधी
पणजी, बातमीदार ः राज्यांतली उश्णताय दिसान दीस वाडत आसा. हवामान खात्यान यलो अलर्ट जारी केला कांय वाठारांनी पावसय झडला. अशें आसतना लेगीत मंगळारा पणजीत चडांन चड तापमान 36 अंश सेल्सियस नोंद जालां. जाल्यार मुरगांवांत चडांन चड तापमान 35.4 अंश सेल्सियस नोंद जाला. आयज आनी फाल्यां वातावरण उश्ण आनी दमट उरपाची शक्यताय हवामान खात्यान उक्तायल्या.
हवामान खात्यान दिल्ले म्हायती प्रमाण फुडले सात दीस राज्यांत चडांन चड तापमान 34 ते 36 अंश सेल्सियस मदीं उरपाची शक्यताय आसा. ह्या काळांत उश्णताय निर्देशांक म्हळ्यार जाणवपी तापमान 40 अंश सेल्सियसापरस उणें आसपाची शक्यताय आसता. सोमारा राज्यांतल्या वेगवेगळ्या वाठारांनी चडांन चड तापमान 33 ते 36 अंश सेल्सियस मदीं आशिल्लें. मंगळारा पणजेचें उण्यांत उणें तापमान 28 अंश सेल्सियस जाल्यार मुरगांवांत उण्यांत उणें तापमान 27.6 अंश सेल्सियस आशिल्लें.
राज्यांत उश्णताय ल्हार येवपाची शक्यताय ना अशें हवामान खात्यान स्पश्ट केलां. पूण नागरिकांनी जतनाय घेवची असो उलो मारला. शक्यतो कोणेंच वताक भोंवचें न्हय, सुती कपडे वापरचे, वताचे भायर सरतना टोपी, छत्री वा हेर साधनां वापरप आनी कुडींतलें उदक उणे जावचें न्हय म्हूण सतत उदक पियेवप अशें उपाय करचे अशें खात्यान सांगला.
17 मे मेरेन यलो अलर्ट
14 ते 17 मे ह्या काळांत राज्यांत वादळी वाऱ्यां सयत पावस पडपाची शक्यताय खात्यान उक्तायला. ते प्रमाण ह्या चार दिसां खातीर येलो अलर्ट जारी केला. 18 ते 20 मे ह्या काळांत राज्यांत मात्सो पावस पडपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
