भांगरभूंय | प्रतिनिधी
हरमल, बातमीदार: मांद्रें पंचायत ग्रामसभेंत घेतिल्ल्या थारावाचेर दुर्लक्ष करून दांडोसवाड्या वयल्या प्रकल्पाक मान्यताय दिल्ल्याचें प्रकरण १३ मेक जाल्ले चर्चेंत उक्तें जालें. आतां मांद्रें पंचायतीच्या निर्णया कडेन ग्रामस्थांचें लक्ष आसा अशें समजता.
ह्या वेळार श्री शहापुरकर हांणी जानेवारी २०२३ चे ग्रामसभेंत कसल्याच प्रकल्पांक परवानो दिवचो न्हय तशेंच दिवचे पयलीं थळाव्यांक विस्वासांत घेवचें असो थाराव सम्मत केल्लो. ही गजाल ह्या वेळार सरपंच प्रशांत नायक हांचे नदरेक हाडून दिली.
दांडोसवाड्या वयल्या श्री हनुमंत पार्सेकार हांच्या घरा मुखार येवपी प्रकल्पा विशीं थळाव्यांनी हरकत घेतिल्ल्यो. पंचायती कडेन आयिल्ल्या कागाळींक लागून सरपंच नायक हांणी ता. १३ मेक पंचायत कार्यालयांत बसका आयोजीत केल्ली. हे चर्चेंत तळावे तशेंच कागाळदार प्रसाद शहापुरकार हांणी ह्या प्रकल्पाचे वायट परिणाम आनी फुडाराक दांडोसवाड्यावर कितें परिस्थिती निर्माण जातली हाचेर म्हायती दिली. हो दांडोसवाड्या वयलो पयलोच प्रकल्प. अशेे प्रकल्प येत रावल्यार पुराय वाडो बांदकामानी घुस्पोन वतलो आनी थळाव्यांक वाव मेळचो ना. हे प्रकल्प गरजेवंतां खातीर न्हय, गिरेस्त लोकां खातीर जावन आसा. प्रकल्प अधिकार्यान सांगिल्लें, आमी सगळ्या गजालींची काळजी घेतले आनी थळाव्यांक हाचो कसलोच त्रास जावचो ना हाचीय हमी तांणी दिल्ली.
मजगतीं, पंचायत थाराव असून लेगीत दांडोसवाड्या वयल्या प्रकल्पाक एप्रील २०२३ त मान्यताय दिल्ली आनी हें जाल्लें चर्चेंत कळ्ळें. विशेश म्हळ्यार ह्या प्रकल्पाक सुचक आनी अनुमोदक म्हणून दांडोसवाड्या भायल्या पंच वांगड्यांचीं नांवां आसात. मजगतीं,१३ तारखेक जाल्ली चर्चा पंचायतीचे बसके मुखार दवरून फुडलो निर्णय घेतले अशें सरपंच प्रशांत नायक हांणी सांगलें.
मजगतीं, पंचायत मंडळ ह्या प्रकल्पा विशीं कितें करतलें हाचे खातीर दांडोसवाड्या वयल्या नागरिकांचे लक्ष आसा.
हे बसकेक हाजीर आशिल्ली दांडोसवाड्याची पंच वांगडी संपदा आजगांवकार हांणी आपूण नागरिकां वांगडा रावतलीं आनी तांंकां त्रास जातलो असल्यो गजाली हांगा जावपाक दिवची ना अशें सांगलें.
हे बसकेक सरपंच, कागाळदार, प्रकल्प अधिकारी तशेंच पंचायत सचीव गोवेकार आनी दांडोसवाड्या वयले तशेंच मांद्रेंचे नागरीक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
