भांगरभूंय | प्रतिनिधी
नावेली व्हिलेजर्स युनियनान कुतिन्हो फॅमिली आंतरगांव फुटबॉल सर्तीचें वस्तादपण मेळयलें. फायनलांत ताणें कुडचडेंच्या गार्डीयन अॅंजेल स्पोर्ट्स क्लबाक टायब्रेकरांत 5-3 अशा फरकान हारयलो. सांताक्रूझ सोसायटी ऑफ पोयतोमाडोन कुंकळ्ळी युनियनाच्या जोड पालवान कुंकळ्ळी शाळेच्या मैदानाचेर आयोजीत केल्ली.
निर्धारीत वेळाच्या खेळांत दोनूय क्लब 1-1 अशे बरोबरींत आशिल्ले. नावेली व्हिलेजर्स युनियना वतीन वॅलिंग्टन आल्मेदान पयल्या अर्दांत गोल केलो, जाल्यार दुसऱ्या अर्दांत पेले कोस्तान गोल करून गार्डीयन अॅंजेलाक बरोबरींत हाडलो.
टायब्रेकरांत नावेली व्हिलेजर्स युनियना वतीन एडेन परेरा, सॅडरॉय डिकोस्ता, रोनाल्डो परेरा आनी टॅरेन्स मिरांडा हाणें गोल केले, जाल्यार गार्डीयन अॅंजेला वतीन रायन मिनेझीस आनी प्रिन्सन मिरांडान एकेक गोल केलो.
ह्या जैतान नावेली व्हिलेजर्स युनियनाक 60 हजाराचें इनाम आनी करंड फावो जालो. गार्डीयन अॅंजेला स्पोर्ट्स क्लबाक 40 हजार आनी करंड फावो जालो.
इनामां भेटवण सुवाळ्याक मुखेल सोयरे म्हणून फा. एर्मिता कुतिन्हो उपस्थीत आशिल्ले.
हेर वैयक्तीक इनामांः व्हेलितो कोस्ता (सर्तींतलो उदेंतो खेळगडो, नावेली व्हिलेजर्स युनियन), जीत गुप्ता (सर्तींतलो उत्कृश्ट गोलकीपर, नावेली व्हिलेजर्स युनियन), पेले कोस्ता (सर्तींतलो उत्कृश्ट डिफॅण्डर, गार्डीयन अॅंजेल स्पोर्ट्स क्लब), आयव्हो कोस्ता (सर्तींतलो उत्कृश्ट मिडफिल्डर, गार्डीयन अॅंजेल स्पोर्ट्स क्लब), वॅलिंग्टन आल्मेदा (सर्तींतलो उत्कृश्ट स्ट्रायकर, नावेली व्हिलेजर्स युनियन).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
