भांगरभूंय | प्रतिनिधी
लोकसभा वेंचणुकेंतल्या चौथ्या टप्प्याचें मतदान काल मंगळारा जालें. आतां मेरेन जाल्ल्या तीन टप्प्यांतल्या मतदाना कडेन तुळा करपाचीच जाल्यार ह्या टप्प्यांत जाल्लें मतदान खऱ्या अर्थान निर्णायक थारूंक शकतलें अशें राजकी जाणकरांक दिसता आनी अर्थांतूच ताचे फाटलीं ठोस अशीं कांय कारणांय आसात. दिल्लीच्या सोरो घोटाळ्यांतले कथीत सुत्रधार तशेंच मुख्यमंत्री अरविंद केजरीवाल हांकां पक्षाच्या प्रचारा खातीर 21 दिसांचो अंतरीम जामीन दिवन सर्वोच्च न्यायालयान एके तरेन लोकसभा वेंचणुकेच्या रिंगणांत उडी घेतिल्ल्याचो निश्कर्श कायद्याचे जाणकार काडटात. जे परिस्थितींत हो निवाडो आयला तो पळयत जाल्यार सर्वोच्च न्यायालयान एका मुखेल आरोपीक फक्त वेंचणूक प्रचारा खातीर अंतरीम जामीन मंजूर करून चुकीचो पायंडो पाडिल्ल्याचीय जी चर्चा सगल्याच प्रसार माध्यमांतल्यान चालू आसा ती घडये लोकसभा वेंचणुको सोंपले उपरांतूय ह्या ना त्या कारणांनी थांबत अशें दिसना.
तिसऱ्या टप्प्यांतल्या मतदानाचेर केजरीवाल हांकां मेळिल्ल्या जामिनाचो उण्या अदीक प्रमाणांत परिणाम जावपाची शक्यताय आसली तरी पांचव्या टप्प्यांत ताचो खरो परिणाम दिल्लींत आनी पंजाबांत मतदानाचेर जावंक शकतलो हाची मात खूबशी शक्यताय आसा. वेंचणूक प्रचारांत ‘जेल रिटर्नड’ केजरीवाल हांची हजेरी उरत जाल्यार ताचो वट्ट निकालाचेर शुन्य परिणाम जातलो असो दावो भाजपा करीत आसली तरी केजरीवाल कांय दिसां खातीर बंदखणी भायर आशिल्ल्यान भाजपाची समिकरणां इबाडचीं नात अशें मात हड्डें बडोवन म्हणूंक येवचें ना.
चौथ्या टप्प्यांत वट्ट 10 राज्यांततल्या 96 सुवातां खातीर सोमारा जें मतदान जालें तातूंत थेट आम आदमी पार्टीक केजरीवाल हांच्या अंतरीम सुटकेचो खंयच लाव जावपा सारकी परिस्थिती नासली तरी ‘इंडी’ आघाडीतल्या काँग्रेस आनी हेर कांय घटक पक्ष आपल्याक थोडेभोव हाचो राजकी फायदो जातलो अशी आस्त निश्चितूच बाळगून आसतले. अस्तंत बंगालांत आठ जाल्यार उत्तर प्रदेशांतल्या तेरा आनी महाराष्ट्र, बिहार मेळून सोळा जाग्यां खातीर चौथ्या टप्प्यांत मतदान जालां. केजरीवाल बंदखणींतल्यान 21 दिसां खातीर भायर आयिल्ल्याच्या चौथ्याच दिसा हें मतदान जाल्ल्यान घडये ‘आप’च्या वांगडी पक्षांक ताचें भांडवल करपाची विशेश संद मेळ्ळी ना, पूण फुडल्या तीन टप्प्यांत ताचो परिणाम भरून काडपाचो तांचो यत्न आसतलो हातूंत दुबाव ना. चौथ्या टप्प्यांतल्याे 96 सुवातो जमेक धरून आतां मेरेन 375 परस चड मतदारसंघांतली मतदान प्रक्रिया पुराय जाल्या आनी फुडल्या तीन टप्प्यांत मेळून अजून सुमार 170 सुवातां खातीर मतदान जावपाचें उरलां, आनी तातूंत मुखेलपणान नवी दिल्ली आनी पंजाबांतल्या सुवातांचो आस्पाव आसून केजरीवाल आनी कंपनीचें लक्ष आतां थंयच अदीक केंद्रीत उरलें जाल्यार ताचें अजाप दिसपाचें कारण ना. आतां नवी दिल्लींत आनी पंजाबांत मेळून आम आदमी पार्टी वीस-एकवीस परस चड सुवातो लडयना आनी तातूंतय खाशेलेंपण म्हळ्यार पंजाबांत तांचो मुखेल प्रतिस्पर्धी खुद्द काँग्रेस पक्षूच तांचे सामकार उबो रावत आशिल्ल्यान केजरीवाल हांचोय हातूंत गोंदळ जालो ना जाल्यार तेंवूय अजापूच थारुये.
केजरीवाल हांकां मेळिल्लो अंतरीम जामीन काँग्रेसी खातीर पंजाबांत मारकूय थारूंक शकता. पांचव्या टप्प्यांत त्या राज्यांत हें दोनूय पक्ष एकामेकां आड कसो प्रचार करतले हें पळोवापाक सगलेच उत्सूक आसतले. केजरीवाल हे सुमार 50 दीस बंदखणींत आशिल्ले आनी स्वातंत्र्या उपरांतच्या काळांतले ते घडये पयलेच मुख्यमंत्री आसुये, जे पदार आसतना बंदखणींत गेले आनी बंदखणींतय ते मुख्यमंत्री म्हूण उरले. ताका लागून अर्थांतूच भाजपान पयल्या चार टप्प्यांतल्या प्रचारांत तांचेर जो खर हल्लो केलो तातूंतल्यान तांणी खूब कितें व्हगडायलें आसतूय, पूण ताची भरपाय करपाची संद न्यायालयान तांकां अंतरीम जामीन मंजूर करून दिली. आतां वीस एकवीस दिसांत ताची ती कितली मेरेन भरपाय करूंक शकतले होच दुबाव आसा. पूण सर्वोच न्यायालयान अंतरीम जामीन दितना केल्ली तांची गोची तांकां थोडी अडचणीचीय थारल्या. कथीत सोरो घोटाळो हें आपले आड भाजपान रचिल्लें षडयंत्र आशिल्ल्याचो तांचो दावो आसलो तरी वेंचणूक प्रचारांत मात ताचेर ते उतर लेगीत उलोवंक शकनात. सर्वोच्च न्यायालयान जामीन दितना घाल्ल्या अटींक लागून तांची प्रचारांतली धार उणी जाल्या. उरफाटें भाजपाक मात ताचो फायदो जाला आनी उक्तेपणान केजरीवाल हांचेर आरोप करून ते भ्रश्टाचाराचे बेताब बादशाह कशे आसात हाचेर भाजपाचे फुडारी भर दितना दिसून येतात. अशा वेळार केजरीवाल हांकां बंदखणींतल्यान मेळिल्लो 21 दिसांचो ‘ब्रेक’ तांकां फायद्याचो काय तितलोच मारक थारतलो हें कळूंक शकना. पूण केजरीवाल हांचो जंय प्रभाव आसा अशा 25 ते 30 मतदारसंघांनी ते निकाल पलटावंक शकतात असोय कांय राजकी अभ्यासकांचो अदमास आसा.
बंदखणींत पन्नाशेक दिसांत अरविंद केजरीवाल हांणी थोडे राजकी संशोधनूय केल्लें दिसता. बंदखणींत निवांत वेळ मेळिल्ल्यान घडये तांकां हें संशोधन करपाची संद मेळ्ळी आसतली. प्रधानमंत्री नरेंद्र मोदी फुडल्या वर्सा 17 सप्टेंबराक पिरायेची 75 वर्सां पुराय करीत आसून ते सक्रीय राजकारणांतल्यान निवृत्त जावन अमीत शाह हांकां प्रधानमंत्रीपदार बसयतले असो सोदूय तांणी ह्या पन्नास दिसांतल्या अभ्यासा उपरांत लायला. आदित्यनाथ योगी हांकां दोन म्हयन्यांत काडून उडयतले अशेंय बंदखणींतल्यान भायर आयले उपरांत तांणी सांगलें आनी आपणें केल्ल्या संशोधनाचे तार्कीक पटोवन दिवपाचो यत्न केलो. वेंचणूक प्रक्रिया पुराय जावपाच्या मार्गार आसतना तांणी केल्लो हो दावो तसो हांसपा सारकोच थारला. भाजपाच्या फुडाऱ्यांनी जाल्यार फुडलीं पांच वर्सा मोदी हेच प्रधानमंत्रीपदार आसतले आनी 2029चे वेंचणुकेतय तेच भाजपाचे फुडारपण करतले असो थोमणो मारून तांच्या दाव्यांतलो वारोच काडून घेतलो.
आपल्या वीस पंचवीस सुवातां खातीर केजरीवाल हांणी जाहीर केल्लो वेंचणूक जाहीरनामो आनी दिल्ली गॅरंटी होवूय एक चर्चेचो विशय जावन उरला. इंडी आघाडीतल्या काँग्रेसी सयत सगलेच घटक पक्ष आपआपले जाहीरनामे घेवन मतदारां मुखार आयिल्ल्यान घटक पक्षांत नाशिल्ली एकवाक्यता प्रकर्शान दिसून आयली. पूण एकूय पक्षाच्या फुडाऱ्याक ताचें कांयच पडून गेल्लें ना अशें दिसून येता. बंदखणींतल्यान मेळिल्लो एकवीस दिसांचो ‘ब्रेक’ वेंचणुकेंत मोटो चमत्कार घडोवन हाडपाची अपेक्षा आपाचो एका वेळा वयलो दुस्मान आशिल्ल्या काँग्रेसी सयत खूबशे विरोधी पक्ष बाळगून आसात. आतां नेमको चमत्कार कितें जातलो हें पळोवपा खातीर आमकां नेमके एकवीस दीस रावचें पडटलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
