पंच वांगडी म्हूण अपात्र: उपसंरपंचाची आव्हान याचिका न्यायालयान भायरायली

भांगरभूंय | प्रतिनिधी

सांगोल्डें पंचायत अर्थीक घोटाळो

म्हापशेंः सांगोल्डेंचे आदले उपसरपंच उल्हास मोरजकार हांणी 16.10 लाख रुपयांचो घोटाळो केल्ल्याचे स्पश्ट जाल्ल्यान पंचायत संचालनालयान तांकां पंच वांगडी पदा वयल्यान अपात्र करपाचो आदेश दिला. ह्या आदेशाक आव्हान दिवपी मोरजकार हांची याचिका पणजेतल्या उत्तर गोंय जिल्हो आनी सत्र न्यायालयान भायरायली.

फाटल्या 27 मार्च 2024 दिसा पंचायत संचालनालयान उल्हास मोरजकार हांकां उपसरपंच पदा वयल्यान काडपाचो आदेश दिल्लो. तशेंच तांकां पंचायत प्रभाग 7 चे पंच वांगडी म्हणून अपात्र केल्ले. ह्या आदेशा प्रमाण 19 मे 2026 मेरेन मोरजकार हांकां वेंचणूक लडोवपाक मेळची ना.

ह्या आदेशाक उल्हास मोरजकार हांणी जिल्हो आनी सत्र न्यायालयांत दिवाणी पुनरिक्षण अर्जा वरवीं अाव्हान दिल्लें. ह्या अर्जा वयली सुनावणी सोमारा 13 मे दिसा जाली. अर्जदाराक कसलीच थाकाय दिनासतना हो अर्ज न्यायालयान भायरावन अपात्रतेचो आदेश कायम दवरलो.

मजगतीं, सांगोल्डेंतले आनंद तुळस्कार हांणी उल्हास मोरजकार हांचे आड 18 ऑगस्ट 2023 दिसा पंचायत संचालनालया कडेन कागाळ दिल्ली. गोवा पंचायतराज अधिनेम, 1994 च्या कलम 210 आनी 210-अ खाला कागाळ दाखल केल्ली.

मे 2021 ते जून 2022 ह्या काळांत पंचायत वांगडी उल्हास मोरजकार हांणी केल्ल्या अर्थीक वेव्हारांची सगलीं कागदपत्रां सादर करपाचे निर्देश सांगोल्डें पंचायत सचिवांक दिल्ले. सचिवांनी कागदपत्रां सादर केले उपरांत तातूंत 8 लाख 70 हजार 935 रुपयांचे पंचायतीचें लुकसाण केल्ल्याचे दिसून आयले. तशेंच खात्याच्या मुख्य अधिकाऱ्यांनी केल्ले तपासणेंत मोरजकार हांणी वट्ट 16.10 लाखांचो घोटाळो केल्ल्याचे स्पश्ट जाले. ताका लागून कलम 210 खाला ही रक्कम तांचे कडल्यान कळंतरा सयत वसूल करची, अशें निर्देश पंचायत संचालक सिद्धी हळर्णकार हांणी अपात्रतायेच्या आदेशात दिल्लें.

सांगोल्डें पंचायतीच्या फाटल्या पंचायत मंडळाचो कार्यकाळ 18 जून 2022 त सोंपला. ते उपरांत 2022 ते 2027 ह्या काळा खातीर नवे पंचायत मंडळ सत्तेत आयलें. हातूंत मोरजकार उपसरपंच जाले. ही कागाळ 2017 ते 2022 ह्या कार्यकाळांत घडिल्ल्या अर्थीक घोटाळ्या कडेन संबंदीत आसा. त्या कार्यकाळांत 7 एप्रील 2021 ते 18 जून 2022 मेरेन मोरजकार सरपंच अाशिल्ले. मे 2021 ते जून 2022 ह्या काळांत तांणी मनमानी पद्दतीन पंचायत निधीचो वापर केलो. 8 लाख 70 हजार 935 रुपया स्वताच चेक वरवीं काडले. हे पंचायत राज कायद्याचें उल्लंघन थारता, अशें तुळस्कार हांणी कागाळेंत नमूद केल्ले.

मोरजकार सरपंच जाले उपरांत 16 एप्रील 2021 दिसा पंचायतीन एक थाराव घेतलो. तातूंत पंचायतीचे बँक खातें मोरजकार हांच्या नांवार हस्तांतरीत करपाचो निर्णय घेतलो. ते उपरांत पंचायत मंडळाच्या नेमा प्रमाण त्या खात्यांतल्यान पयशे काडप बंधनकारक अाशिल्ले. मात, ते उपरांत 34 खेपे मोरजकार हांणी बँकेंतल्यान मनमानी पद्दतीन पयशे काडले, अशेंय कागाळेंत नमूद केल्ले. सुनावणी सुरू अासतना पंचायत संचालकांनी सचिवांक तांणी केल्ल्या वेव्हाराची सगली म्हायती मागिल्ली.

सचिवांनी सादर केल्ले म्हायती प्रमाण 16लाख 10 हजार रुपयांचो घोटाळो केल्ल्याचे दिसून आयले.

मजगती, प्रतिवादी मोरजकार हांणी हे आरोप बिनबुडाचे अाशिल्ल्याचे म्हणिल्लें. ही रक्कम पंचायतीच्या कामां खातीरूच वापरिल्ल्याचो दावोय तांणी केल्लो. पूण ठोस पुरावे ते सादर करपाक शकले नात. सुनावणी उपरांत पंचायत संचालकांनी तुळस्कार हांचे कागाळेंत तथ्य आशिल्ल्याचे नमूद करून उल्हास मोरजकार हांकां उपसरपंच पदा वयल्यान काडचे तशेंच पंचायत वांगडी म्हूण अपात्र केल्ले. ते खातीर सांगोल्डेंच्या प्रभाग 7 त पोटवेंचणूक घेवची पडिल्ली. मजगतीं, ह्या आदेशाक लागून मोजरकार हांकां पोटवेंचणूक लडोवपाक मेळची ना. 19 मे 2026 मेरेन ते वेंचणूक लडोवपाक अपात्र थारल्यात.