भांगरभूंय | प्रतिनिधी
गुन्यांव सिद्द जाल्या उपरांत कायद्या प्रमाण कारवाय जातली
पणजी, प्रतिनिधी : नेत्रावळी अभयारण्यांतल्या साळजिणी कास करून पार्टी करपाक गेल्ले कर्मचारी न्यायालयात जामीन मेळ्या उपरांत परतून कामार दाखल जाले. सगळे 16 कर्मचारी मडगाव डेपोंत कामाचेर दाखल जाले, अशी म्हायती कदंब म्हामंडळाच्या वेवस्थापकी संचालकांनी दिली. गुन्याव सिद्ध जाल्या उपरांत नेमा प्रमाण कारवाय जातली, अशें वेवस्थापकी संचालक डेरिक नेटो हांणी सांगलें.
कदंब म्हामंडळाचे सांगें वाठारांतले चालक, वाहक मेळून 16 कर्मचारी शेनवारा रातीं 9.30 वराच्या सुमाराक टप्प्याटप्प्यान नेत्रावळी हांगा वताले. तांचे हालचाली वेल्यान ते कास करून पार्टी करपा खातीर अभयारण्यांत वतात आशिल्ल्याचो दुबाव रानां अधिकाऱ्यांक आनी कर्मचाऱ्यांक आयलो. रानां कर्मचाऱ्यांनी 16 जाणांक ताब्यात घेवन गुन्यांव नोंद केलो.
सोमारा न्यायालयान 16 कर्मचाऱ्यांक अटी घालून जामिनाचेर सोडले. जामीन मेळ्ळ्या उपरांत सगळे जाण मडगांव डेपोंत कामार दाखल जाले.
गुन्यांव सिद्द जाले उपरांत कारवाय
कदंब कर्मचाऱ्यांचेर कास पार्टी विशीं जो गुन्यांव नोंद जाला, तो कदंब म्हामंडळा कडेन संबंधीत ना. हाका लागून राना खातें वा सरकारा कडल्यान आदेश ये मेरेन म्हामंडळ कारवाय करू शकना. गुन्यांव सिद्द जाल्या उपरांत कायद्यात आशिल्ल्या तजविजे नुसार कारवाय जातली. कारवायेची प्रक्रिया आजून सुरू जावंक ना, अशी म्हायती नेटो हांणी दिली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
