भांगरभूंय | प्रतिनिधी
लोटली पंचायतीचें भौशीक बांदकाम खात्याक पत्र
मडगांव, प्रतिनिधी ः नव्या बोरी पुलाची जमीन संपादना करपा खातीर मर्यादा घालपाची प्रक्रिया सोमारा सुरू जावपाची आशिल्ली. पूण लोटली पंचायतीन भौशीक बांदकाम खात्याक पत्र बरोवन कामाचो आराखडो, गरजेची परवानगी, सीआरझेड भाग, मर्यादा आदी म्हायती मागल्या आनी ही म्हायती मेळ्ळ्या उपरांतच जमनी संपादनाची फुडली प्रक्रिया करपाची मागणी केल्या.
नवो बोरी पुल बांदपाचो प्रस्न अजून सुटावो जावंक ना. बोरी पूल बांदपाखातीर जमीन संपादन करपाक लोटली आनी वाठारांतल्या नागरिकांनी हांचे आदींय विरोध केल्लो. फकत कोळशाची येरादारी सोपी करपा खातीर हो रस्तो करतात असोय आरोप आशिल्लो. सोमारा बोरी पुलाची मर्यादा थारावपाचे प्रक्रिये खातीर टेक्नोजेम सल्लागार, भूंय सर्वेक्षण खातें आनी हेर खात्याचे अधिकारी हाजीर आसतले अशें भौशीक बांदकाम खात्यान णव तारखेक लोटली पंचायतीक पत्र बरयल्लें.
मजगतीं, लोटली पंचायतीन ह्या जमीन संपादनाचे मर्यादेची प्रक्रिया करपाक हरकत घेतल्या. पंचायती कडल्यान भौशीक बांदकाम खात्याच्या फोंडें विभागाक पत्र धाडून आदली सर्वेक्षणाची म्हायती, मर्यादा, जमनीचें व्हॅल्युएशन आनी हेर प्रक्रिया म्हायती, सल्लागार वा हेर कोणा कडेन थेट संपर्क करचो, पंचायती कडल्यान खंयचो सहकार जाय, सीआरझेड भूभाग, खाजन वाठाराची पळोवणी आनी सर्वे क्रमांक सयत अहवाल, खाजन वाठार करपाच्या कामां सयत कामांच्या दर एका पांवड्या विशीं म्हायती दिवपाची मागणी केल्या. तशेंच पंचायतीक गरजेची सगळी म्हायती मेळ्ळे बगर नव्या बोरी पुलाची जमीन संपादना खातीर मर्यादेचे काम करचें न्हय अशें पंचायतीन सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
