कायदो प्रवेश परिक्षे खातीर अर्ज भरपाचे निमणे तारखेंत वाड

भांगरभूंय | प्रतिनिधी

वेबसायट दुरूस्त, 16 मे मेरेन शुल्का सयत अर्ज भरचेः गोंय विद्यापीठ

पणजी, प्रतिनिधी : बॅंक पेमेंट वेबसायटींत तांत्रिक बिघाड जाल्ल्यान कायदो महाविद्यालयाच्या प्रवेश परिक्षे खातीर अर्ज भरपाची निमणी तारीख गोंय विद्यापीठान 16 मे मेरेन फुडें धुकल्ल्या. बँकेची वेबसायट सोमारा दनपरां दुरुस्त जाल्या, अशे कळीत करून विद्यार्थी आतां शुल्क भरून प्रवेश परिक्षे खातीर नोंदणी करपाक शकतात अशे, विद्यापीठान सांगलां.
गोंयात बीए एलएलबी कायदो विषयांचे पदवे खातीर गोंय विद्यापीठान प्रवेश परिक्षे खातीर आॅनलाइन अर्ज मागोवपांक सुरवात केल्ली. सोमारा 13 मे हो निमणो दीस आशिल्लो. पूण भुरग्यांक प्रवेश परिक्षेचें शुल्क भरपांक अडचणी येताल्यो. फाटल्या शुक्रारा सावन गोंय विद्यापीठाच्या वॅबसायटीचेर विद्यार्थी प्रवेश परिक्षे खातीर नोंदणी करताले. पुण सगळे डाॅक्युमेंत अपलोड केले उपरांत जेन्ना ते शुल्क भरपांक वताले तेन्ना भारतीय स्टेट बँकची वेबसायट चलनासली. सेगीत तीन दीस ही वेबसायट त्रास दिताली. देखून निमणे दिसा नोंदणी जायत काय ना अशी भिरांत विद्यार्थ्यां मदीं पातळिल्ली.
आयज विद्यार्थ्यांक जावपी अडचणींची दखल घेत गोंय विद्यापीठान अर्ज भरपांची निमणी तारीख फुडे धुकलून 16 मे केल्या. ते भायर भारतीय स्टेट बँकेंची वेबसायट सुरू जाल्या अशे सांगून विद्यार्थ्यांनी शुल्क भरचे, अशे विद्यापीठान कळीत केलां.
पणजेचे व्ही एम साळगांवकर कायदो महाविद्यालयांत आनी मडगांवचे कारे कायदो महाविद्यालयांत कायद्याचें शिक्षण मेळटा. ह्या दोनय काॅलेजींनी प्रवेश घेवपा खातीर गोंय विद्यापिठान प्रवेश परिक्षा सक्तीची केल्या. 12 वी पास जाल्ले बी. ए. एलएलबी पदवी घेवपी इच्छुक भुरग्यां खातीर 2024- 25 वर्सा खातीर गोंय विद्यापीठान कॉमन लॉ एडमिशन टेस्ट ही प्रवेश परिक्षा जाहीर केल्या.
सामान्य, इडब्ल्युएस आनी ओबीसी खातीर रु 500 तर एसटी आनी एसएसी रु 250 प्रवेश शुल्क आसतलें. दिव्यांग भुरग्यांक कसलेंच शुल्क लागचेंना. 20 मेक हॉल तिकेट मेळटली जाल्यार 25 मेक प्रवेश परिक्षा जातली, अशेंय विद्यापीठान सांगलां.