भांगरभूंय | प्रतिनिधी
सभापती रमेश तवडकार हांकां बरयलें स्मरणपत्र
पणजी, बातमीदार ः काँग्रेस पक्षाचे अध्यक्ष अमित पाटकार हांणी आयज सभापती रमेश तवडकार हांकां पत्र बरोवन सप्टेंबर 2022 वर्सा काँग्रेसींतल्यान भाजपांत आयिल्ल्या आठ आमदारांचेर प्रलंबीत आशिल्ल्या अपात्रताय याचिकेचेर निर्णय घेवपाची मागणी केली.
14 सप्टेंबर 2022 दिसा काँग्रेसींतल्यान भाजपांत वचपी आठ आमदारांचेर 6 डिसेंबर 2022 दिसा दाखल केल्ले प्रलंबीत अपात्रताय याचिकेचेर तुमी निर्णय घेवचो अशी मागणी करता अशें पाटकार हांणी पत्रांत म्हणलां.
हालींच सभापतीन दोन आमदार मायकल लोबो आनी दिगंबर कामत हांचे आड निवाडो केल्ल्या याचिकेचोय उल्लेख ह्या पत्रांत केला. ही याचिका हाचे पयलीं श्री. पाटकार हांणीच दाखल केल्ली.
भारताच्या संविधानाच्या धाव्या अनुसुचीचें उल्लंघन केल्ल्यान मायकल लोबो, दिगंबर कामत, आलेक्स सिक्वेरा, संकल्प आमोणकार, रुदोल्फ फर्नांडिस, डिलायला लोबो, राजेश फळदेसाय आनी केदार नायक हांकां अपात्र थारावपा खातीर काँग्रेसीच्या अध्यक्षांनी डिसेंबर 2022 त गोंय विधानसभेचे सभापती कडेन याचिका दाखल केल्ली. सभापतीन तांचें मुखार प्रलंबीत आशिल्ल्या याचिकेचेर निर्णय घेवपाक कळाव केल्यार हेर सगले कायदेशीर पर्याय हांव सोदून काडटलो अशें अमित पाटकार हांणी म्हणिल्ले.
काँग्रेस पक्षाच्या बॅनराचेर वेंचून आयिल्ले आठ आमदार पक्ष सोडून सप्टेंबर 2022 वर्सा भाजपांत आयले. उपरांत काँग्रेस अध्यक्षांनी सगल्या आठ आमदारांचेर अपात्रताय याचिका दाखल केल्ली जी फाटल्या 17 म्हयन्यां सावन सभापती मुखार प्रलंबीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
