भांगरभूंय | प्रतिनिधी
रेल्वेंत उरिल्लें 17.2 तोळ्यांचें भांगर प्रवाशाक केलें परत
भांगरभूंय । प्रतिनिधी
मडगांवः वसयच्यान राजापूर वचपी मांडवी एक्स्प्रेसींतल्यान प्रवास करपी प्रवासी आपली बॅग रेल्वेंतूच विसरलो. ते बॅगेंत 17.2 तोळे भांगर आशिल्लें. स्टेशनमास्तराक म्हायती दिले उपरांत थिवी स्टेशनाचेर बॅगाचो सोद घेतलो. बॅग मेळ्ळ्या उपरांत म्हाला सयत तें प्रवाशाक परत दिलें.
मेळिल्ले म्हायती प्रमाण, मुंबय जोगेश्वरी पूर्व वाठारांत रावपी विरेंद्र विलास खाडे हे वसयच्यान मांडवी एक्स्प्रेसींतल्यान जनरल डब्यांतल्यान 11 मेक प्रवास करताले. राजापूर स्टेशनाचेर देंवले उपरांत ताची घरकान्न विराली खाडे हांचे 17.2 तोळे वजनाचें भांगर आशिल्लें काळ्या रंगाचें बॅग गाडयेंतूच उरिल्ल्याचें तांच्या लक्षांत आयलें. तांणी हाची म्हायती राजापूर स्टेशनाच्या स्टेशन मास्तराक दिली. स्टेशनमास्तरान थिवी रेल्वे सुरक्षा दळाक हाची म्हायती दिली. कणकवली रेल्वे सुरक्षा दळा कडेन चवकशी केली तेन्ना जनरल डब्यांत बॅग मेळूंक ना, अशें सांगिल्लें.
थिवी रेल्वे सुरक्षा दलाचे हेड कॉन्स्टेबल अनंत आनी प्रवीण मोरे हांणी थिवी स्टेशनाचेर गाडयेची तपासणी केली. तेन्ना तांकां काळ्या रंगाचें बॅग मेळ्ळें. तांणी कोंकण रेल्वे अधिकार्यांचे हाजेरींत बॅगाची तपासणी केली. तेन्ना त्या बॅगांत प्रवाशांनी सांगिल्लें प्रमाण भांगर मेळ्ळें. ह्या बॅगांत 5 तोळ्याचें मंगळसूत्र, 3 तोळ्यांचो हार, 4 तोळ्यांची वट्ट 4 कांकणां, 3 तोळे 5 ग्रॅम वजनाच्यो 4 सरपळ्यो, 11 ग्रॅमाच्यो मुदयो, कानांतलीं रिंगां आनी झुमके असो 17 तोळे 2 ग्रॅमाचो म्हाल सांपडलो. प्रवाशांक हे विशीं म्हायती दिल्या उपरांत ते थिवी पावले. चवकशे मजगतीं भांगर तांचेंच आशिल्ल्याची खात्री केली. विरेंद्र हांणी घरकान्नीक व्हिडिओ कॉल करून म्हाल दाखयलो आनी तिणें सगळें भांगर आसा अशें सांगलें.
रेल्वे पुलिसांनी पंचनामो करून 12 मेक सकाळीं हें भांगर आनी बॅग प्रवासी विरेंद्र विलास खाडे हांचे कडेन दिलें. प्रवाशांनी रेल्वे सुरक्षा दळ, कोंकण रेल्वे अधिकारी आनी पुलिसां कडल्यान मेळिल्ल्या आदाराची तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
