भांगरभूंय | प्रतिनिधी
महेश वागळे हांणी लायिल्ल्या म्हस्काक लागली 49 इंचांची सांग
भांगरभूंय । अजय लाड
मडगांवः आकें- मडगांवां रावरी लक्ष्मण उर्फ महेश वागळे हांकां पोरसूं लावपाचो, शाक भाजयो रोवपाचो छंद भुरग्यापणांतल्यान आसा. ह्याच छंदाक लागून ताचें नांव आतां संवसारभरार पावलां. वागळे हांणी लायिल्ल्या म्हस्काक 49 इंचांच्यो म्हणल्यार 124.46 सेंटीमिटर इतल्यो लांब सांग लागली. कृशी अधिकाऱ्यांच्या पंगडान केल्ले पळोवणे उपरांत हो संवसारीक विक्रम आशिल्ल्याचें सिद्ध जालें. ते खातीर इलायट वर्ल्ड रेकॉर्डा कडल्यान तांकां परबीं दिवपीं पत्र आयलां.
म्हस्काच्यो सांगो आमी भाजये खातीर वापरतात, पूण त्योच म्हस्काच्यो सांगो वाडून संवसारीक विक्रम जालो. हेच खातीर आक्यां रावपी महेश वागळे हांकां संवसारभरांत मान- सन्मान फावो जालो.
महेश वागळे हांणी सांगलें, ल्हानपणांतल्यानूच आपल्याक पोरसांत काम करपाचो, रोपे लावन वाडोवपाचो छंद आशिल्लो. हो छंद आपणे आपले पुरतो बाळगिल्लो, कसलेच प्रसिद्धी खातीर न्हय. मडगांवच्या मार्केटांत कपड्याचें दुकान आसा. थंयचें काम सोंपले उपरांत सांजे येवन घरा कुशीच्या पोरसांत लायिल्ल्या झाडांची जतनाय घेतालों. पोरसांतूच आपूण भेंडें, वांयगीं, मुळो, पालक, मेथी, दुदी, कोंकण दुदी, तवशीं अश्यो भाजयो लायतां. कांय सर्तींनी इनामांय मेळ्ळ्यांत. पोरूं इश्ट गुरुदत्त नायक हांणी म्हस्काच्या झाडाची खांदी दिल्ली. ती खांदी रंगाच्या एका डब्यांत लायिल्ली. ती वाडटनाच ताचो वयलो भाग हुंदरांनी खाल्लो. परतून जतनाय घेवन तो रोप वाडयलो. ताका उपरांत दोन खांद्यो आयल्यो. सुमार स म्हयन्यांनी रोप वाडून ताका फुलां आयलीं. ते उपरांत दोन सांगो दिसपाक लागल्यो. तातूंतली एक सांग तोडली तेन्ना ती 49 इंच इतली लांब वाडिल्ल्याचें दिसलें. अशें वागळे हांणी सांगलें.
इलायट ऑफ वर्ल्ड रेकॉर्डा वतीन दखल
आपणे घरच्यांक ती सांग दाखयतना चल्यान ताचो फोटो काडलो आनी ताची लांबाय मेजली. ताणें इंटरनॅटार तपासून पळयलें जाल्यार हे आदीं बंगळुरूंतले एके बायलेच्या नांवार 46 इंच लांबायेच्यो म्हस्काचे सांगेचो विक्रम आशिल्लो. मागीर चल्यान इलायट वर्ल्ड रेकॉर्डा कडेन संपर्क केलो. थंयच्या अधिकाऱ्यांनी ताका सांगलें, हे संबंदांत थळाव्या कृशी अधिकाऱ्यांचे पळोवणे उपरांत निर्णय घेतले. कृशी संचालक नेवील आफान्सो हांकां सांगलें उपरांत तांणी कृशी अधिकाऱ्यांक धाडले. तांणी पळोवणी करून ते उपरांत प्रमाणपत्र दिलें. तें प्रमाणपत्र इलायट वर्ल्ड रेकॉर्डाक धाडले उपरांत तांणी परबीं दिवपी पत्र धाडलां, अशें महेश वागळे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
