भांगरभूंय | प्रतिनिधी
पणजीः फाटल्या कांय दिसां सावन राज्यांत उश्णतायेंत व्हड प्रमाणांत वाड जाल्ल्ली. तापमान ३४ अंश सेल्सियस परस चड आशिल्लें. अशे परिस्थितींत हवामान खात्याच्या अदमासा प्रमाण राज्यांतल्या वेगवेगळ्या वाठारांनी पावस पडलो. मजगतीं, राज्य हवामान खात्यान एलो अलर्ट जारी करून राज्यांत फुडले तीन दीस गडगड्या सयत पावस पडपाची शक्यताय उक्तायल्या.
शेनवारा राज्यांतल्या विवीध वाठारांनी पावस पडलो. तातूंत फोंडें आनी पोरणें गोंयांत दरेकीं देड इंच पावस पडलो. वाळपय १.१५ इंच पावस पडलो. ताका लागून थळाव्या लोकांक उश्णतायेंतल्यान व्हडली सुटका मेळ्ळी. पूण दक्षिण गोंयच्या मडगांव, केपें, काणकोण वाठारांनी पावस पडूंक ना.
मजगतीं, शेनवारा सांजवेळार सुरू जाल्ल्या पावसाक लागून उत्तर गोंयच्या सत्तरी, तिसवाडी, बर्देस, पेडणें आनी दक्षीण गोंयच्या फोंडे म्हालांतल्या विंगड विंगड गांवांनी पावस व्हडा प्रमाणांत पडलो. कांय वाठारांनी पावस शिरशिरलो जाल्यार कांय कडेन व्हड प्रमाणांत पडलो. स्मार्ट सिटी खाला काम चालू आशिल्ले पणजेंत पावस पिडिल्ल्यान थळाव्यांक आनी मोटार सायकल चालकांक बरेच त्रास सोंसचे पडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
