भांगरभूंय | प्रतिनिधी
नवी दिल्ली, खबरां संस्था: लोकसभा वेंचणुकेचे फाटभूंयेर भौशीक चर्चा सुरू केल्ल्याची कॉंग्रेस फुडारी राहुल गांधी हांणी तोखणाय केली. ‘हांव वा पक्षाचे मुखेली मल्लिकार्जुन खरगे हांकां असले चर्चेंत वांटो घेवपाक खोस भोगतली.’ प्रधानमंत्री नरेंद्र मोदीय हे चर्चेंत वांटो घेतले अशीय आस्त तांणी उक्तायली. घटमूट लोकशाये खातीर मुखेल पक्षांनी देशा मुखार एके माचये वयल्यान तांचो दुश्टीकोन मांडप हो एक सकारात्मक उपक्रम आसतलो, अशेंय राहुल गांधी हांणी ‘एक्स’चेर म्हणलें.
हे चर्चेंत प्रधानमंत्री मोदी हांणीय वांटो घेवचो, अशी देशाची अपेक्षा आशिल्ल्याचें तांणी म्हणलां.
आदले न्यायाधीश मदन बी लोकूर, अजित पी. शहा आनी एन. राम हांणी ह्या सप्तकाचे सुरवातेक राहुल गांधी आनी प्रधानमंत्री नरेंद्र मोदी हांकां पत्र बरोवन वेंचणुकेच्या म्हत्वाच्या प्रस्नांचेर चर्चा करपाक आमंत्रीत केल्ले. चर्चा प्रस्ताव निपक्षपाती आनी दरेका नागरिकाच्या व्यापक हिता खातीर आसा अशें तिगांयनी म्हणिल्लें. ताचेर राहुल गांधी हांणी ‘एक्स’ वरवीं जाप दिल्ली.
‘‘हांवें चर्चेच्या आमंत्रणा विशीं पक्ष अध्यक्ष खरगे हांचे कडेन चर्चा केली.तांणी हे खातीर हयकार दिवन, अशे चर्चेक लागून जनतेक आमचो दुश्टीकोन समजपाक आनी एखाद्याची निवड करपाक मजत जातली. अशे चर्चेक लागून राजकीय पक्षांचेर जावपी निराधार आरोप थारतले, तशेंच वेंचणूक लढपी मुखेल पक्ष म्हणून जनतेन तांच्या फुडार्यांक सरळ आयकप योग्य थारतलें, ताका लागून म्हाका वा कॉंग्रेस अध्यक्षांक असले चर्चेंत वांटेकार जावपाक खोस भोगतली आनी आमी ते खातीर उत्सूक आसा, अशेंय राहुल गांधीन म्हणलें.
प्रधानमंत्री केन्ना चर्चेंत वांटेकार जावपाक तयार जाले काय आमकां कळयात
‘‘प्रधानमंत्री केन्ना वांटेकार जावपाक तयार आसात हें आमकां कळयात. उपरांतूच आमी चर्चेचे तपशील आनी स्वरूप हाचेर चर्चा करतले’, अशें राहुल गांधी हांणी म्हणलें.
मजगतीं, शुक्रारा लखनौ एके कार्यावळींत श्रोत्यांच्या एका प्रस्नाची जाप दितना गांधी हांणी म्हणलें, ‘ते वादविवादांत मोदीं मुखार वचपाक तयार आसा. मात मोदी ते खातीर तयार जावचे नात, असो दावो राहुल हांणी केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
