भांगरभूंय | प्रतिनिधी
पणजी, बातमीदार ः गोंयांत फाल्यां आनी परवां वादळी वाऱ्यां सयत मध्यम पावस पडपाची शक्यताय आसा. पणजी हवामान खात्यान ह्या दोन दिसां खातीर ‘यलो अलर्ट’ जारी केला. तशेंच 14 ते 17 मे ह्या काळांत कांय सुवातींनी मात्सो पावस पडपाचो अदमास उक्तायला. पणजे सयत कांय सुवातींनी आयज दमट वातावरण आशिल्ले.
हवामान खात्यान आयज पणजी शारांत चडान चड तापमान 34.4 अंश सेल्सियस आनी उण्यांत उणें 25.5 अंश सेल्सियस नोंद केलां. मुरगांवांत चडान चड तापमान 34 अंश सेल्सियस आनी उण्यांत उणें तापमान 26 अंश सेल्सियस आशिल्लें. फुडले सात दीस राज्यांत चड तापमान 33 ते 36 अंश सेल्सियस मदीं उरपाची शक्यताय आसा.
मजगतीं, फुडल्या पांच दिसांच्या चडांन चड तापमानांत व्हडलोसो बदल जावपाची शक्यताय ना. राज्यांत 12 ते 17 मे ह्या काळांत ओलसाण 80 ते 90 टक्क्यां मदीं आसपाची शक्यताय आसा. उश्णताय निर्देशांक म्हळ्यार जाणवपी तापमान 40 अंश सेल्सियस सकयल उरपाची शक्यताय आसा. 16 आनी 17 मे दिसा हवामान सुकें उरतलें असो अदमास खात्यान उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
