भांगरभूंय | प्रतिनिधी
भांगरभूंय । खबरां मेज
पणजी : रिलायन्स इंडस्ट्रीजचे अध्यक्ष मुकेश अंबानी आनी तांचो पूत अनंत अंबानी हांणी आसामांतल्या हुंवाराच्या पिडेस्तांक मजतीचो हात दिला. आसाम मुख्यमंत्र्याच्या मदत निधीक रिलायन्स फावंडेशनान 25 कोटी रुपया योगदान दिलां. सोशल मिडियाचेर उपकार व्यक्त करतना आसामचे मुख्यमंत्री डॉ हिमंत विश्व सरमा हांणी म्हणलें, “ह्या कठीण काळांत आसामी लोकां वांगडा उबे रावपा खातीर मुकेश अंबानी आनी अनंत अंबानी हांचे खूब आभार. हो निधी आमच्या मजत कार्यांत खूब म्हत्वाचो थारतलो.”
रिलायन्स फावंडेशन फाटलो एक म्हयनो आसामांतल्या हुंवार पिडेस्तांक मजत करता. हे खातीर रिलायन्स फावंडेशन पंगड आसाम राज्य आपत्ती वेवस्थापन प्राधिकरण, भलायकी आनी कुटुंब कल्याण खातें आनी राष्ट्रीय भलायकी मिशन, पशुपालन आनी पशुवैजकी खातें, जिल्लो प्रशासन आनी हेर नागरी संस्थां वांगडा वावुरता.
चडांत चड लुकसान जाल्ल्या काचार आनी नागांव जिल्ह्यांतल्या वेगवेगळ्या सुवातींनी वैजकी शिबिरां घडोवन हाडटात आनी आपत्कालीन मजत किट वांटप सुरू आसा. पशुधन शिबिरां घडोवन हाडपाचें काम सुरू आसा. 1 जून सावन शिबिरां सुरू जाले उपरांत 1900 परस चड लोकांची तपासणी करून उपचार जाल्यात. पशुपालन शिबिरांनी 10 हजार 400 परस चड रानवटी जनावरांचेर उपचार जाल्यात.
वैजकी शिबिरां भायर रिलायन्स फावंडेशन भलायकेच्या गरजे खातीर किट तशेंच आपत्कालीन मदत म्हणून सुकी रेशन किट वांटपाक लागल्या. आतां मेरेन 5 हजारां परस चड कुटुंबांक किट वांटल्यात. काचार जिल्ह्यांतल्या सिलचर, कालीन, बोरखोला आनी कटिगोर ब्लॉकांतल्या पिडेस्तांक रिलायन्स फावंडेशन मजत करता. नागांव जिल्ह्यांतल्या कठियाटोली, राहा, नागांव सदर आनी कामपूर ह्या प्रखंडांनीय मदत कार्य चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
