भांगरभूंय | प्रतिनिधी
नवी दिल्ली, खबरां संस्था ः देशांतल्या सरकारी येवजण्यांचो लाव घेवपा खातीर आनी तुमचें वळखपत्र म्हणून आधार कार्ड हो एक म्हत्वाचो दस्तावेज. आधार कार्डांत तुमचो वैयक्तीक आनी बायोमेट्रीक तपशील आसता. दर 10 वर्सांनी तो दस्तावेज अपडेट करप गरजेचे. फाटलीं कांय वर्सां तुमी तुमचें आधार कार्ड अपडेट करूंक ना जाल्यार आतां फुकट अपडेट करूंक शकतात.
पूण आधार कार्डांत खंयचोय बदल करचो आसल्यार शुल्क भरचें पडटलें. जातूंत आपलो पत्तो आनी मोबायल नंबर बदलपा खातीर 50 रुपया शुल्क भरचें पडटा. तेच प्रमाण हेर बदल करपा खातीरय तुमकां शुल्क भरचें पडटलें.
भारतीय युनिक आयडेंटिफिकेशन अॅथॉरिटीन आधार कार्ड फुकट अपडेट करपाची मुजत वाडयल्या. आतां आधार कार्ड धारकांक 14 जून मेरेन आपलें आधार कार्ड फुकट अपडेट करपाक मेळटलें. हाचे उपरांत तुमकां अपडेट करपाक शुल्क भरचें पडटलें. खंयच्याय प्रकारची डुप्लीकेशन आनी फटवणूक टाळपा खातीर वापरप्यांनी वेळोवेळ आपलो आधार अपडेट करत रावपाक जाय. कारण भारतांत वळखपत्र आनी सरकारी येवजण्यांचो लाव घेवपा खातीर आधार कार्ड सक्तीचें आसा.
आधार अपडेट आनी नोंदणी नियमावली 2016 प्रमाण वळख पुरावो आनी पत्तो दर 10 वर्सांनी अपडेट करचो पडटलो. ब्ल्यू आधार कार्डाचेरूय होच नेम लागू जाता. 5 वर्सां सकयल्या भुरग्यां खातीर ब्ल्यू आधार तयार करतात. आधार धारक आपलें नांव, पत्तो, जल्म तारीख, लिंग, फोन क्रमांक, ईमेल पत्तो आनी संबंद स्थिती अपडेट करूंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
