भांगरभूंय | प्रतिनिधी
नवी दिल्ली, खबरां संस्था: केबिन क्रू च्या वांगड्यांनी एका वेळार रजा घेतिल्ल्यान एअर इंडिया एक्सप्रेसांत बरोच बोवाळ जाल्लो. एअर इंडियाक कालूय कांय विमानां रद्द करचीं पडिल्लीं. आयज बिरेस्ताराय एअर इंडियाभ एक्सप्रेसची ७० परस चड विमानां रद्द जाल्यां. तशेंच कांय विमानां उसरां उडटलीं. ताका लागून प्रवाशांक बरेच त्रास सोंसचे पडटात. कर्मचार्यांनी बंड आपयल्ल्यान एअर इंडियाचेर विमानां रद्द करपाची वेळ आयल्या. निमाणें एअर इंडिया एक्सप्रेसीन केबीन क्रू च्या २५ वांगड्यांक काडून उडयले. नेमांचो अहवाल दिवन एअर इंडियान ही कारवय केली. ज्या कर्मचार्यांक नोकरे वयल्यान काडल्यात तातूंत सीक लिवचेर गेल्ले कर्मचारी आसात. कर्मचार्यांक लागून त्रास प्रवाशांक भोगचे पडटात.
आतां मेरेन मेळिल्ले म्हायती प्रमाण, जीं विमानां बिरेस्तारा रद्द केल्यांत, तातूंत चेन्नय-कोलकाता, चेन्नय-सिंगापूर आनी त्रिचे-सिंगापूर हीं विमानां आसात. लखनव ते बंगळुरु फ्लायटाक उशीर जातलो. एअर इंडिया एक्सप्रेसींत काम करपी ३०० परस चड कर्मचारी बुधवारा कामार येवंक ना. ह्या सगळ्या कर्मचार्यांनी आदीं वांगडाच सीक लीव खातीर अर्ज केलो. मोबायल फोन ऑफ केलो. ताका लागून बुधवारा विमानांच्या ऑपरेशन्सांनी एअर इंडियाक खुबश्या आडखळींचो सामनो करचो पडलो.
नोकरेचे नवे नेम हें कर्मचार्यांनी रजा घेतिल्ले फाटलें कारण जावन आसा. ह्या सगळ्या कर्मचार्यांचो नव्या नेमांक विरोध आसा. एअर इंडिया एक्सप्रेसच्या प्रवक्त्यान बुधवारा सांगलें, आमच्या केबीन क्रू चे खुबशे वांगडी मंगळारा रातचे ड्युटेक येवचे पयलीं दुयेंत पडले. ताका लागून जायतीं विमानां रद्द करचीं पडलीं. तशेंच कांय विमानां उसरां उडलीं.
कर्मचारी संघटणेचो कितें आरोप?
एअर इंडिया एक्सप्रेसच्या कर्मचार्यांनी अशें पयलेच फावटी केलां. एअर इंडिया वेवस्थापन वेवस्थीत काम करिना. कर्मचार्यां वांगडा जावपी वेव्हारांत समानताय ना. अशें एअर इंडिया एक्सप्रेस केबीन क्रू वर्गाचें प्रतिनिधीत्व करपी एका संघान आरोप केल्लो. ‘मॅनेजमेंट वेवस्थीत जाय नाशिल्ल्यान कर्मचार्यांच्या मानसिकतायेचेर परिणाम जाला’ अशें एअर इंडिया एक्सप्रेस कर्मचारी संघटणेन आरोप केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
