भांगरभूंय | प्रतिनिधी
सावयवेरें: केरी फोंडेंच्या श्रीविजयादुर्गा संस्थान आनी विजयादुर्गा सांस्कृतीक मंडळा वतीन आयोजीत केल्ल्या 25 व्या एका दिसाच्या ‘निवासी प्राथमीक ब्रह्मचर्याश्रम’ वर्गाचो उक्तावण सुवाळो हालींच कल्याण मंडपांत जालो. ह्या वर्गांत सुमार 50 परस चड बटुंनी वांटो घेतलो. हो वर्ग 26 मे मेरेन चलतलो.
उक्तावण सुवाळ्याक मुखेल सोयरे म्हूण गोंयचे युवा घनपाठी वेदमुर्ती योगेश बोरकार हाजीर आशिल्ले. तशेंच माचयेर देवस्थानागचे अध्यक्ष डॉ. संतोष देसाय, सचीव राजेंद्र देसाय, सांस्कृतीक मंडळाचे अध्यक्ष मनोहर देसाय, सचीव सर्वेश जोशी तशेंच काणे गुरुजी बी मानेस्त हाजीर आशिल्ले.
ह्या वेळार मार्गदर्शन करतना योगेश बोरकार हांणी म्हणलें, ‘निवासी प्राथमीक ब्रहमचर्य’ वर्ग हो उपक्रम राबोवप आव्हानात्मक आसा. वेगळ्यावेगळ्या सुवातां वेल्यान वेगळ्यावेगळ्या वातावरणांत वाडिल्ल्या भुरग्यांचेर संस्कार करप तशेंच तांचे वाणीचेर आनी मनाचेर आपल्या पुर्विल्ल्या संस्कृतायेची वळख करून दिवपाची आयज गरज आसा. आयज आपल्या धर्माचेर आनी संस्कृतायेचेर भायल्या परस आमचेच चड आक्रमण करीत आसात. इतलीं आक्रमणां जावन लेगीत आमची संस्कृती आनी परंपरा वेदाक लागूनच अविरतपणान चालूच आसा.
वेद ही ईश्वराची स्वास घेवपी हवा आसून वेद सुरवाती सावन निमाणें मेरेन समाजाच्या सामान्य कल्याणाचो उदेश करतात. वेदाचें पठण आनी श्रवण केल्ल्यान आपली शुद्धी जाता. तशेंच जिणेंत संध्याची सामकी गरज आशिल्ल्यान दरेकान आळस करिनासतना संध्या दोन फावटी करप सामकी गरजेची आसा. संध्या न करपी मनीस अशुद्ध आसता. जाका ज्ञान मेळोवपाची इत्सा आसा तांणी भगवान शंकराची उपासना करची. जांको मोक्षाची इत्सा आसा तांणी विष्णूची जाल्यार जांकां निर्मळ भलायकी जाय तांणी सुर्याची उपासना करची अशें मार्गदर्शन दिवन पालकांनी आपल्या भुरग्यांक अशे तरेच्या वासंतीक वर्गाक सेगीत धाडचे अशें आवाहन बोरकार हांणी केलें.
प्रास्तावक आनी येवकार मनोहर देसाय हांणी केलें. मुखेल सोयऱ्यांची वळख सर्वेश जोशी हांणी केली. राजेंद्र देसाय हांणी वर्गा विशींची पुराय म्हायती दिली. ह्या वेळार डॉ. संतोष देसाय हांणी आपले विचार मांडले.
मानेस्तांचे हस्तुकीं दिवली पेटोवन वर्गाचें उक्तावण केलें. सुत्रसंचालन सर्वेश जोशी हांणी केलें. जाल्यार सोहन जठार हांणी उपकार मानले. सुवाळ्याक बटूं सयत तांचे पालक व्हड संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
