भांगरभूंय | प्रतिनिधी
बरेली, खबरां संस्था: बरेली जिल्हो न्यायालयान बलात्काराचो आरोप फट हें सिद्ध जाले उपरांत आरोप केल्ले चल्याक निर्दोश घोशीत करून चलयेक १,६५३ दिसांची ख्यास्त दिली. चलयेच्या फट आरोपाक लागून तरणाट्या मजुराक बंदखणींत रावचें पडिल्लें. वांगडा न्यायालयान फट आरोप करपी चलयेक ५,८८,८२२ रुपयांची लुकसाण भरपाय शिक्षा भोगिल्ल्या तरणाट्याक दिवपाचो आदेश दिलो.
न्यायालयान म्हणलें, एखाद्याचें बेकायदेशीर उद्दिश्ट पुराय करपाक पुलीस आनी न्यायालय माध्यम म्हणून वापरप आक्षेप घेवपा सारकें आसा. अन्याय करून फायदो घेवपी बायलांक दादल्यांच्या हिताचेर घात करवानगी मेळची ना.
प्रकरण अशें आसा
२ सप्टेंबर २०१९ दिसा चलयेचे आवयन बरेली एका चल्या आड आपले धुवेचेर बलात्कार केल्ल्या प्रकरणांत एफआयआर दाखल केल्ली. पुलिसांनी त्या चल्याक अटक करून बंदखणींत धाडलो. ह्या प्रकरणांत तो ८ एप्रील २०१९ ते २४ एप्रील २०२४ मेरेन बंदखणींत उरलो. चलयेन पयलीं पुलिसांक आनी उपरांत कोर्टांत आपल्याचेर बलात्कार जाल्ल्याची कबुली दिल्ली. मात, ८ फेब्रुवारी २४ दिसा तिणें हें विधान फाटीं घेतलें. आदीं जें कितें सांगिल्लें तें चेंपणा खाला येवन सांगिल्लें अशें ते चलयेन सांगलें. सहायक सरकारी अधिवक्ता सुनील पांडे हांणी सांगलें, फट पुरावे दिवप आनी बनावट कागदपत्रां रचिल्ल्या प्रकरणांत गुन्यांव नोंद करपाची तरतूद आसा, जातूंत जन्मठेप वा ७ वर्सां परस चड शिक्षा जावपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
