भांगरभूंय | प्रतिनिधी
जै न धर्माचे चोविसावे तिर्थांकर अहिंसेचे मुर्तीमंत प्रतीक भगवान महावीर हांची जयंती हालींच जाली. भगवान महावीर हांचो जल्म वैशाली राज्याच्या कुंडलपूर हांगा इसवीसन पूर्व 599 वर्सा जालो. तांच्या बापायचें नांव सिद्धार्थ जाल्यार आवयचें नांव त्रिशला अशें आशिल्लें. तांच्या भावाचें नांव नंदिवर्धन जाल्यार भयणीचें नांव सुदर्शना अशें आशिल्लें.
तांचे भुरगेपण राजेशाय थाटांय गेलें. भगवान महावीर आठ वर्सांचे आसतना तांकां शिक्षक आनी शस्त्र विद्येचे प्रशिक्षण घेवपा खातीर शाळेंत धाडलो. भगवान महावीर हांचें कुटूंब जैनांचे तेविसावे तिर्थांकार भगवान पार्श्वनाथ हांचें अनुयायी आशिल्ले. भगवान महावीर 28 वर्सांचे आसतनाच तांच्या आवय-बापायक मरण आयले उपरांत तांणी श्रामणी दीक्षा घेतली. उपरांत कांय दिसांनी तांकां आत्मज्ञान प्राप्त जालें. तांणी 12 वर्सा मौन पाळ्ळें. हटयोग्या प्रमाण तांणी कुडीक कश्ट दिले. ज्ञानप्राप्ती उपरांत तांणी जनकल्याणा खातीर उपदेश दिवपाक सुरवात केली, ते खातीर तांणी त्या काळार प्रचलीत आसपी अर्धमागधी भाशेचो आदार घेतला. इंद्रीय आनी विशय वानेचे सूख दुसर्याक दुख्ख दिवनूच मेळोवं येता अशें तांचे मत आशिल्ले. ताका लागूनच तांणी जैन धर्माच्या अहिंसा, सत्य, अस्तेय, अपरिग्रह हे विशीं ब्रह्माचार्याचोय आस्पाव केला. त्याग, संयम, प्रेम, करुणा, शील आनी सदाचार हे तांच्या प्रवचनाचें सार आशिल्लें. तांणी चतुर्वेध संघाची स्थापणूक करून समता हेच जिणेचें लक्ष आशिल्ल्याचें सांगलें.
देशांत खूब कडेन भोंवून भगवान महावीरांनी ह्या पवित्र संदेशाचो प्रचार केलो. बिहारांतल्या पावापुरी हांगा पिरायेच्या 72 व्या वर्सा तांचें निर्वाण जालें. तो दीस आशिल्लो कार्तीक कृष्ण अमाशेचो. भगवान महावीरांच्या जल्म आनी निर्वाण दिसा घराघरांत दिवे लायतात. भगवान महावीर म्हणटात की, जाणते वा अजाणतेंपणांतल्यान कोणाची हिंसा करप योग्य न्हय. तशेंच दुसर्याचे वतिनूय कोणाची हिंसा घडोवन हाडची न्हय. खंयच्याय जिवांक मन, कूड वा उलोवपान दंडीत करचें न्हय. सगल्यां भितर एक आत्मो आसा. आपले प्रमाणूच दरेक जिवांक आपआपलो जीव प्रीय आसा. ताका लागूनच खंयच्या जिवा प्रती हिंसा करची न्हय. स्वता हिंसा करपी, दुसर्यां कडल्यान हिंसा घडोवन हाडपी आनी दुसर्यान केल्ल्या हिंसेचे समर्थन करपी स्वता प्रती दुस्वास वाडयत आसता अशें तांचें मत आशिल्लें.
खंयच्याय प्रकारची हिंसा न करप हीच ज्ञानाची खरी परिभाशा आसा. अशे तरेन तांणी ज्ञानाची व्याख्या केल्या. आपल्या आत्म्या विशीं आसपी भाव हेर जिवां विशीं आसूं दी. सगल्या प्राणिपात्रां विशीं अहिंसेचो भाव राखात. मन, वाणी आनी कुडीन कोणाचीय हिंसा न करपी खरो संयमी म्हणून मानतात अशी संयमी मशनाची व्याख्या तांणी केली.
चलतना, बसतना, उलयतना, जेवण करतना असावध आसपी स्वताची पुराय खात्री जाले बगर, पयल्या आनी विचार केले बगर कृती करपी हिंसा करत आसता अशें तांचें मत आशिल्लें. दुख्खाक सगलेच जीव भियेत आसतात हें लक्षांत घेवन खंयच्याय जिवाक कश्ट पावोवप टाळचें अशें ते आपल्या प्रवचनांत सदांच सांगताले.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
