भांगरभूंय | प्रतिनिधी
दोग माकोड आनी माजर
एका रानांत एक व्हडलें वडाचें झाड आशिल्लें. त्या राना कुशीकच्या गांवचे जायते लोक रानांतल्या शारांत वताले. वाटेक मेळपी त्या वडाच्या झाडा कडेन लोक विसव घेवन आपल्या फुडल्या कामाक लागताले. त्या वडाच्या झाडार खुबशीं माकडांय रावताली.
एकदां रानाच्या कुशीक आशिल्ल्या गांवांतलो दामू दूद, तूप, लोणी घेवन शारांत विकपा खातीर भायर सरलो. रानांत पावलो तेन्ना मात्सो विसव घेवचो म्हणून तो त्या वडाच्या झाडा मुळांत येवन बसलो. तांणी ताचे कडेन आशिल्लें सामान कुशीक दवरलें आनी तो मात्सो लवंडलो. ताचो थंयच दोळो लागलो. त्या वडाच्या झाडार दोग जाण माकड आशिल्ले. दामू येतना त्या दोगांनी पळयल्लें आनी दामुच्या सामानाचेरूय तांची नदर आशिल्ली. दामू न्हिदला तें त्या दोगांय माकडांनी पळयलें. ते दोगूय वडा वयल्यान सकयल देंवले आनी कुशीक दवरिल्लें सामान सांसपुपाक लागले. तातूंत तांकां दूद, तूप आनी लोणयेचे बुडकुले दिसले. त्या दोगांयनी तातूंतलो लोणयेचो बुडकुलो उखल्लो आनी थंयच्यान नाच्च जाले. एके सुवातेर व्हरून तो बुडकुलो तांणी दवरलो. तो बुडकुलो कांय वेळ ते पळयत उरले आनी हाडिल्ल्या बुडकल्यांतलें लोणी कशें वाटून खावचें तें येवजुपाक लागले. येवजतां येवजतां बुडकुलो भरून आशिल्लें लोणी अर्दें अर्दें वाटून घेवपाचेर त्या दोगांय माकडां मदीं झगडें पेटलें. वाद घालून जाले उपरांत लोणी दुसर्या कोणाय कडल्यान दोगांय मदीं सारकें वाटून घेवचें अशें त्या दोगांय मदीं थारलें.
ते दोगूय माकोड एका माजरा कडेन गेले. माजरान लोणी दोगांय मदीं सारकें वाटपा खातीर एक तागडी आनी एक बुडकुलो हाडपाक सांगलें. तागडी आनी बुडकुुलो मेळटांच माजरान एका बुडकुल्यान भरून आशिल्ली लोणी दुसर्या बुडकुल्यान वोतली. तांणी तागडेचे दोनूय वटेन बुडकुले दवरले. एके वटेन तागडी चड जाली म्हणून माजरान ती सारकी करुया अशें सांगून तातूंतल्यान इल्ली लोणी खावन उडयली. एके वटेंतली लोणी खाल्ल्यान दुसरे वटेंतली लोणी चड जाली. तांणी दोनाय बुडकुल्ल्यांचे वजन समान करून दिसां अशें सांगून आनी वजन उणें-चड करून करून दोनाय बुडकुल्यांतलें सगळें लोणी सोंपयलें. माजरान सगळें लोणी सोपोवन उडयलें हें त्या दोगांय माकडांक कळूंक लेगीत ना. माकड ताका पळयतूच उरले. तांकां खावपाक कांयच उरूंक ना. माजरान थंयच्यान हळून पळ काडली. आमी दोगूय झगडले आनी ताचो फायदो माजरान घेतलो हें त्या दोगाय माकडांक खूब उसरां समजलें. आनी त्या दोगांयनी कपलार हात मारलो.
देख: कसलोय निर्णय घेतना तो समजिकायेन घेवचो. ना जाल्यार दोगांच्या झगड्यान तिसर्याक फायदो जाता. जसो हे काणयेन माजराचो फायदो जालो तसो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
