भांगरभूंय | प्रतिनिधी
नवी दिल्ली, खबरां संस्था ः भारतांतल्यान सिंगापूर आनी हांग्कांगांत निर्गत केल्ले सगळे मसाले आनी रेडी टू ईट/कुक खाणां आतां ईटीओ (इथिलीन ऑक्सायड) चांचणी पास जाले उपरांतच ह्या देशांनी धाडटले. भारत सरकाराच्या स्पाइसेस बोर्डान हो आदेश जारी केला. सिंगापूर आनी हांग्कांग ह्या दोन मुखेल भारतीय ब्रँडाच्या मसाल्यांत इथिलीन ऑक्सायड मेळ्ळे उपरांत भारत सरकाराच्या स्पाइसेस बोर्डान हें व्हडलें पावल उबारलां.
इथिलीन ऑक्सायड चांचणी बगर निर्गत ना
ह्या दोन देशांनी निर्गत जावपी सगळ्या मसाल्याची पयली देशांत ‘सक्तीची’ इथिलीन ऑक्सायड चांचणी जातली आनी उपरांतच ह्या देशांनी तें धाडटले. सिंगापूरांतल्या खंयच्याय खाणांत इथिलीन ऑक्सायडाची चडांत चड पातळी 50 पीपीएम आनी हांग्कांगांत शून्य आसा, जाल्यार भारतीय कंपनीं मसाले आनी हेर तयार केल्लीं उत्पादनां धाडूंक शकतात अशेंय स्पाइसेस बोर्डान आपल्या आदेशांत सांगलां. इथिलीन ऑक्सायडची लॅब चांचणी उपरांतच हांग्कांगांत धाडटात.
तेच प्रमाण 50 पीपीएम परस इथिलीन ऑक्सायड उणें आसल्यार भारतीय कंपनींक मसालो आनी रेडी टू ईट/कुक सिंगापूराक निर्गत करपाक मेळटा. भारतांतल्यान सिंगापूर आनी हांग्कांगांत धाडिल्ल्या मसाल्याची आनी हेर तयार केल्ल्या खाणांची सक्तीची ईटीओ चांचणी खातीर स्पाइसेस बोर्डाचो आदेश 6 मे सावन लागू जातलो.
हांग्कांग आनी सिंगापूरांत एमडीएच आनी एव्हरेस्ट ह्या लोकप्रिय ब्रँडांचे विक्रीचेर बंदी घाल्या, कारण ह्या उत्पादनांत कॅन्सर जावपाक कारणीभूत आशिल्लें रसायन इथिलीन ऑक्सायड मेळ्ळें. हाचे उपरांत भारत सरकाराच्या स्पाइसेस बोर्डान हें पावल उबारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
