चंद्राच्या फोंडकुलांत उदकाचो बर्फ, इस्रोचो दावो
भांगरभूंय | प्रतिनिधी
चंद्राच्या उत्तर ध्रुवाचेर उदकाच्या बर्फाचें प्रमाण दक्षीण ध्रुवा परस दुपेट
नवी दिल्ली, खबरां संस्था ः चंद्राच्या फोंडकुलांत उदकाचो बर्फ आसा असो दावो भारतीय अंतरिक्ष संशोधन संघटनेन (इस्रो) केला. हो अभ्यास स्पेस अॅप्लिकेशन सेंटर (SAC)/ISRO हांगाच्या शास्त्रज्ञांनी आयआयटी कानपूर, युनिव्हर्सिटी ऑफ सदर्न कॅलिफोर्निया, जेट प्रोपल्शन लॅब आनी आयआयटी (ISM) धनबाद ह्या संशोधकांच्या मजतीन केला.
आयएसपीआरएस जर्नल ऑफ फोटोग्रामेट्री अँड रिमोट सेन्सिंगांत उजवाडाक आयिल्ल्या अभ्यासा प्रमाण पृश्ठभागाच्या कांय मिटर सकयल बर्फाचें प्रमाण पृश्ठभागा परस 5 ते 8 पटींनी चड आसा अशें इस्रोन सांगलें.
चंद्राच्या उत्तर ध्रुवांत दक्षीण ध्रुवा परस चड बर्फ चंद्राच्या उत्तर ध्रुवाचेर उदकाच्या बर्फाचें प्रमाण दक्षीण ध्रुवा परस दुपेट आसा असोय दावो इस्रोन ह्या अभ्यासा वरवीं केला. 2008 वर्सा धाडिल्ल्या चंद्रयान मिशनांत चंद्राच्या पृश्ठभागाचेर उदकाचो बर्फ आसतलो असो अदमास काडिल्लो. चंद्रयान 2 च्या ड्युअल फ्रिक्वेन्सी सिंथेटिक अपर्चर रडार उपकरणांतल्यान मेळिल्ल्या ध्रुवीय रडार डेटांतय असोच दावो केल्लो.
ज्वालामुखींतल्यान भायर सरपी उदकाक लागून फोंडकुलांत बर्फ जमता
3.85 अब्ज वर्सां आदीं इम्ब्रियन काळांत जाल्ल्या ज्वालामुखीच्या स्फोटाक लागून चंद्राचीं फोंडकुलां उदकान भरिल्ले अशें ह्या अभ्यासांतल्यान स्पश्ट जालें.
ह्या संशोधनाक इस्रो आनी हेर संशोधकांनी सात उपकरणा वापरली जांतूत रडार, लेसर, ऑप्टिकल, न्यूट्रॉन, स्पेक्ट्रोमीटर, अल्ट्रा-व्हायोलेट स्पेक्ट्रोमीटर आनी चंद्राचे कक्षेतल्या थर्मल रेडिओमीटर हांचो आस्पाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
