भांगरभूंय | प्रतिनिधी
वॉशिंग्टन डीसी, खबरां संस्था : जॉन्सन अँड जॉन्सन हे कंपनीन एक व्हडलो निर्णय घेतला. तांणी म्हणलां, आमचेर अमेरिकेंत दाखल केल्ले हजारांनी खटले निकालांत हाडपाक आमी ६.५ अब्ज डॉलर्स दिवपाक तयार आसात. येवपी २५ वर्सांनी आमी ही रक्कम दितले, अशें हे कंपनीन बुधवारा, १ मेक सांगलें. हे कंपनीच्या टॅल्कबेस्ड उत्पादनांक लागून अंडाशयाचो कॅन्सर (Ovarian Cancer) जाला, असो कागाळदारांचो आरोप आसा. जॉन्सन अँड जॉन्सन हे कंपनीच्या प्रस्तावाचेर कागाळदारांनी आजूनय कसलोच निर्णय घेवंक ना.
सगळे खटले सोडोवपाचो कंपनीचो निर्णय
हे कंपनी आड अमेरिकेंत खुबश्या जाणांनी कागाळ दाखल केल्या. फाटल्या खुबश्या वर्सां सावन ह्या खटल्यांचेर सुनावणी चालू आसा. ताका लागून हे सगळे खटले निकालांत काडपाक हे कंपनीन आतां ६.५ अब्ज डॉलर्स दिवपाची तयारी दाखयल्या.
९९ टक्के खटल्यांनी कॅन्सर जाल्ल्याचो दावो
ह्या खटल्यांक लागून कंपनीक अर्थीक फटको बसला. तशेंच जनसंपर्काचे नदरेन हे कंपनींक खुबश्या आडखळींक तोंड दिवचें पडलां. आमी आमचें टॅल्क बेबी पावडराचें उत्पादन थांबयलां. तशेंच आमचीं दुसरीं टॅल्कबेस्ड उत्पादनां वापरपाक सुरक्षीत आसात, अशें कंपनी म्हणटा. हे कंपनी आड दाखल केल्ल्या सुमार ९९ टक्के खटले हे अंडाशयाचो कॅन्सर जाल्ल्याचो दावो करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
