भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज येजमान सनरायझर्स हैदराबाद आनी राजस्थान रॉयल्स ह्या पंगडां मदीं मॅच जातली. राजस्थान रॉयल्साची प्ले ऑफांतली सुवात लागींलागीं निश्चीत जाल्या. पूण, हैदराबादाचें हे मॅचीचेर खूब कितें निंबून आसा.
कांय दिसां पयलीं उत्कृश्ट फॉर्मांत आशिल्ल्या हैदराबादाक रॉयल चॅलेंजर्स बंगळुरू आनी चेन्नय सुपरकिंग्स ह्या पंगडां आड मोखीचो फाटलाव करतना हारी घेवच्यो पडल्यात. ह्या हारींक लागून हैदराबादा गुणतकट्यांत पयल्या चारांतल्यान भायर पडला. सध्या तो पांचवे सुवातेर आसा. पॅट कमिन्साच्या फुडारपणाखाला खेळपी ह्या पंगडाचे वयले सुवाते वयले आनी मदले फळयेंतले बॅट्समन मोखीचो फाटलाव करतना अपेशी थारल्यात. ताका लागून मोखीचो फाटलाव करतना चड आक्रमक बॅटींग करपाची आमची रणनिती चुकीची थारल्या अशें मुखेल प्रशिक्षक डॅनिएल व्हितोरीन म्हणलां.
हैदराबादान पयलीं बॅटींग करतना दोन खेपे 250 परस चड धांवड्यो केल्यात. पूण, मोखीचो फाटलाव करतना ताका एकदा लेगीत 200 आंकडो हुपपाक जमूंक ना.
आमी मोखीच दिवपाक येसस्वी थारल्यात. पूण, मोखीचो फाटलाव करपाक आमकां शिकपाची गरज आसा अशें रॉयल चॅलेंजर्स बंगळुरू आड हार घेतल्या उपरांत पत्रकारां कडेन उलयतना व्हितोरीन म्हणिल्लें.
ट्रॅव्हिस हेड आनी अभिषेक शर्मा हांचेर हैदराबादाचो पंगड बरोच निंबून आसा. दोगूय अपेशी थारल्या उपरांत हैदराबादाचो डाव गडगडटा. एडेन मार्करमाक लेगीत आपल्या आदल्या फॉर्मांत येवचो पडटलो. ताका अजून मेरेन म्हणपा सारकें प्रदर्शन करपाक जमूंक ना. दुसरे वटेन राजस्थान रॉयल्साचो प्रवास आडखळी बगर चल्ला.
पयल्या हंगामाचें वस्तादपण जोडपी राजस्थानान दरेक पंगडा आड जबरदस्त प्रदर्शन केलां. सध्या तो 16 गूण घेवन पयले सुवातेर आसा. ताचे कडेन जोस बटलर, यशस्वी जयस्वाल आनी मुखेली संजू सॅमसन सारके फॉर्मांत आशिल्ले बॅट्समन आसात. शिमरोन हेटमायर आनी रॉवमॅन पॉवेल हांचे खेरीत रियान पराग आनी ध्रुव जुरेल लेगीत धांवड्यो करता. बॉलिंग विभागांत ताचे कडेन अणभवी युजवेंद्र चहल, ट्रॅण्ट बोल्ट आसात, जाल्यार आवेश खान आनी संदीप शर्मा सारके जोशान भरिल्ले बॉलर आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
